Месси, Неймар, Allison ва бошқалар. Лотин Америкасининг энг қиммат футболчилари

Ҳеч кимга сир эмаски, Жанубий Америка мамлакатлари аҳолиси футболни шунчаки ёқтирмайди, балки у билан яшайди. Бразилия, Аргентина, Уругвай каби жамоалар эса ўзларининг юлдуз футболчилари билан мақтана олади. Ўз навбатида юқоридаги мамлакат ўйинчилари доимий равишда Европа майдонларини забт этиб келган. Қуйида айнан ушбу минтақанинг энг қиммат футболчилари ҳақида фикр юритилади.

Хосе Мария Хименес — 65 миллион евро, Уругвай, «Атлетико»

Рўйхатдан икки нафар ҳимоячи ўрин олган, улардан бири «Атлетико» ҳимоя қўрғони Хосе Мария Хименесдир.

2013 йилда «матрасчилар» 26 ёшли ҳимоячи учун 900 минг евро сарфлаган, у эса ортда қолган йиллар давомида ўзининг ишончли ўйини орқали клуб тарихидаги энг яхши ўйинчиларидан бирига айланди. Аммо сўнгги пайтларда у жароҳатлар борасида жуда кўп муаммоларга дуч келмоқда, ҳозирча бу унинг трансфер қийматига таъсир ўтказмай турибди.

Федерико Вальверде — 70 миллион евро, Уругвай, «Реал»

Хименеснинг ватандоши рўйхатда тўққизинчи ўринга лойиқ кўрилди. 22 ёшли Федерико Вальверде учун 2019/20 йилги мавсум омадли кечди.

Федерико 2017 йилдан бери Уругвай терма жамоасида ўйнаб келмоқда, ҳозирда у таркибдаги энг ишончли ўйинчилардан бири ҳисобланади. Гарчи камроқ ўйнаётган бўлса-да, бу мавсум ҳам Вальверде учун ёмон ўтмаяпти деб айтиш мумкин.

Маркиньос — 70 миллион евро, Бразилия, ПСЖ

Рўйхатдаги иккинчи ҳимоячи Маркиньосдир. Бразилиялик футболчи 2013 йилдан бери ПСЖ сафида тўп суриб келади ва ўшандан кейин ўз ўрнини ҳеч кимга бермаяпти. Ўшанда Париж клуби унинг трансфери учун 31,4 миллион евро тўлаганди.

Маркиньос — кўп қиррали футболчи бўлиб, таянч зонасида ҳам бекам-у кўст ўйнаши мумкин. Тиаго Сильва «Челси»га кетганидан кейин у парижликлар ҳимоясидаги энг муҳим ўйинчига айланди.

Каземиро — 70 миллион евро, Бразилия, «Реал»

Кўпинча футболда таянч ярим ҳимоячилари ўзлари лойиқ бўлган эътирофга сазовор бўлмайди, аммо уларсиз ҳеч қайси жамоа маълум ютуққа эришмаган бўларди. Каземирони эса ўз позициясининг энг яхшиларидан бири деб ҳисоблаш мумкин. У 2013 йилдан бери «Реал»га кетма-кет совринларни қўлга киритишда ёрдам бериб келмоқда. Каземиро ўзининг техник хусусиятлари билан мақтана олмаса ҳам, ўйинни ўқий олиш ва майдонни яхши кўриш қобилияти билан исталган футболчига рақобатчи бўлиши мумкин.

Шунингдек, Каземиро ўз позициясининг ҳам энг қиммат футболчиларидандир. У трансфер қиймати борасида фақат «Бавария» футболчиси Йозуа Киммихдан (90 миллион евро) орқада.

Лаутаро Мартинес — 70 миллион евро, Аргентина, «Интер»

2018 йилда Аргентинанинг «Расинг» клубидан «Интер»га йўл олган Лаутаро Мартинес дарҳол «Сан Сиро»нинг севимли футболчисига айланди ва «неразурри» таркибида 39 та гол уришга улгурди. 23 ёшли ҳужумчи ўз позициясида Европанинг энг зўрларидан бири ҳисобланади. Ўз вақтида унга 22,7 миллион евро сарфлангани кўплаб танқидларга учраганди, аммо у ўз ўйини билан бу танқидларнинг барчаси ноўрин эканлигини исботлади.

2020 йилнинг ёзида Испания грандлари сафига қўшилиши кутилган Мартинес катта эҳтимол билан 2023 йилда ниҳоясига етадиган шартномасини узайтирса керак.

Пауло Дибала — 70 миллион евро, Аргентина, «Ювентус»

Бир неча йиллардан буён Пауло Дибаланинг футбол оламидаги янги юлдуз бўлиши ваъда қилинади. Аммо бу ҳамон қуруқ гаплигича қолмоқда.

Дибала бу мавсумда барқарор ўйин кўрсата олмаяпти, шунга қарамай унинг истеъдодини инкор этиб бўлмайди. У «Ювентус» сафида 2015 йилдан бери 244 учрашувда 98 та гол ва 40 та голли узатмани амалга оширди.

Рўйхатдаги бошқа футболчилардан фарқли ўлароқ, Дибаланинг нархи аста-секин пасайиб бормоқда. 2018 йилда у 110 миллион еврога баҳоланганди, ҳозир эса «атиги» 70 миллион.

Роберто Фирмино — 72 миллион евро, Бразилия, «Ливерпуль

Кўпинча Жанубий Америка вакилларини Ла Лигада кўриш мумкин. Аммо сўнгги пайтларда Англияда ҳам жанубликлар кўпайиб бораётганини инкор этиб бўлмайди.

Ўтган йили «Ливерпуль» билан чемпионлик унвонини қўлга киритган Фирмино кам гол ураётганига қарамай Юрген Клопп жамоасининг асосий ўйинчиси бўлиб қолмоқда. Бразилиялик «қизиллар» сафига қўшилганида, унинг трансфер қиймати 33 миллион еврони ташкил қилган бўлса, ҳозирда бу бир неча бараварга ошган. Бироқ бундан кейин нархнинг кўтарилиши даргумон, боиси унинг ёши 30 га яқинлашиб қолди.

Алиссон — 80 миллион, Бразилия, «Ливерпуль»

«Ливерпуль»нинг яна бир бразилиялик футболчиси Алиссон Мерсисайд клубининг асосий ва алмаштириб бўлмас дарвозабони ҳисобланади.

2018 йилда 62,5 миллион евро эвазига «қизиллар» сафига қўшилган Алиссон дунёнинг энг қиммат дарвозабонлар рўйхатида иккинчи поғонани (биринчи ўринда Ян Облак 90 миллион евро) банд этди. Унинг ҳозирги трансфер нархи 80 миллион еврони ташкил қилди.

Шу вақтдан бошлаб у ФИФА талқини бўйича энг яхши дарвозабон бўлишга ва Лев Яшин мукофотини қўлга киритишга улгурди.

Лионель Месси — 80 миллион евро, Аргентина, «Барселона

Месси футбол тарихидаги энг яхши ўйинчилардан бири ҳисобланади. Бугунги «Барселона»ни усиз тасаввур қилиш имконсиздир.

Аммо ортда қолган йиллар барча нарсалар қатори Мессининг нархига ҳам таъсир ўтказмай қолмади. Унинг амалдаги трансфер нархи 80 миллион еврога баҳоланган. 2020 йилнинг энг яхши футболчиси соврини учун курашда эса у Роберт Левандовски ва Криштиану Роналдудан кейин 3-ўринни қўлга киритди.

Неймар — 128 миллион евро, Бразилия, ПСЖ

Неймарнинг ушбу рўйхатга киритилганидан ҳеч ким ажабланмаса керак. Боиси бразилиялик 222 миллион евро эвазига «Барселона»дан ПСЖга ўтганида бутун трансфер бозорини остин-устун қилиб юборганди.

Парижда ҳам Неймар гол уришда давом этмоқда: у 102 учрашувда 83 та гол урди ва 46 та ассистни амалга оширди. Аммо Франция пойтахтида уни жароҳатлар тинч қўймаяпти. Шу боис у аксарият ҳолларда ўйинларда қатнашиш ўрнига уларни томоша қилиш билан чекланмоқда.

128 миллион еврога баҳоланаётган ҳужумчидан олдинда фақат бир ўйинчи бор, бу унинг жамоадоши Килиан Мбаппе (180 миллион евро).

Бошқа мақолалар: