АҚШда бир нечта йирик Twitter аккаунтларини бузиб кирган ўсмир вояга етмаганлар колониясида уч йиллик қамоқ жазосига ҳукм қилинди. Бу ҳақда Daily Mail хабар берди.

Фото: WFLA News Channel 8

Грэм Иван Кларк шериклари билан бирга фирибгарлик йўли билан жабрланувчилардан биткоинларни олиш учун 130 та йирик компания ва жисмоний шахсларнинг Twitter аккаунтларини бузиб кирган. 2020 йилнинг 15 июль куни содир этилган мазкур кибержиноят натижасида Барак Обама, Жо Байден, Билл Гейтс, Илон Маск, Жефф Безос ва Канье Уэстнинг аккаунтларига бузиб кирилган.

Фото: Twitter

Шунингдек, қонунбузар Apple ва Uber компанияларига тегишли профилларни бузиб кирган. Барча бузилган аккаунтларни тўплаш орқали Кларк уларнинг номидан бошқа фойдаланувчиларга рақамли валютадаги маблағларини икки баробар кўпайтиришга ваъда берадиган таниқли фирибгарлар схемасини эълон қилишни бошлади.

Фото: Twitter

Текширув натижаларига кўра, ўспирин қиймати 180 минг доллардан ортиқ бўлган биткоинларни олишга муваффақ бўлганидан кейин тизим фош бўлди ва ёпиб қўйилди.

Флорида прокуратураси ўсмирга нисбатан 30 та иш қўзғатди. Жиноят содир этган пайтда Кларк 17 ёшда эди, бу жазони бир оз юмшатишга ёрдам берди. Аслида, ушбу моддада 10 йиллик қамоқ жазоси кўзда тутилган. Лекин Кларк фақат уч йилга қамалди. Қамоқхонадан ташқари ўспирин ўзининг барча аккаунтлари ҳақида маълумотларни расмийлаштириши керак, шунингдек, Кларк фақат назорат остида компьютердан фойдаланиши мумкин.

Twitter ушбу киберҳужум юзасидан ички текширув ўтказди ва хакерлар телефон орқали фирибгарлик усулини қўллаганини аниқлади.

Аввалроқ нидерландиялик киберхавфсизлик бўйича мутахассис, GDI Foundation нотижорат ташкилоти ҳамасосчиси Виктор Геверс АҚШнинг собиқ президенти Дональд Трампнинг паролини тахмин қилиб топиб, унинг Twitter’ига кира олганини маълум қилган эди.