Франциянинг собиқ президенти, илгари коррупцияда айбланиб судланган Николя Саркози яна судга тортилади, бу сафар у 2012 йилги сайловолди кампаниясини ноқонуний молиялаштириш ва фирибгарликда айбланмоқда. Бу ҳақда France 24 хабар берди.
Хабарга кўра, Саркозининг муваффақиятсизликка учраган сайловолди кампаниясида митинглар ва тарафдорлар билан учрашувларнинг ҳаддан ортиқ дизайни учун сарфланган пуллар лимитдан 24 миллион долларга ошиб кетган. Харажатларни қоплаш учун унинг штаб-квартираси ходимлари сохта ҳисоблар билан молиявий фирибгарликка қўл урган.
Франция собиқ раҳбарининг ўзи ўшанда нималар бўлаётганидан бехабар бўлганини таъкидламоқда. Агар айбдор деб топилса, у бир йилгача озодликдан маҳрум қилиниши ва 4500 доллар миқдорида жаримага тортилиши мумкин.
Аввалроқ Саркози коррупция иши бўйича суд қарори устидан шикоят киритишини маълум қилганди. Унинг адвокати ўз мижозига чиқарилган суд ҳукми асосланмагани ва холис эмаслигини таъкидлаган. У Саркозининг айбсиз эканлигини исботлашга уринишини ваъда қилган.
Эслатиб ўтамиз, 1 март куни Париж суди Саркозини коррупция ва мансабни суиистеъмол қилганлик билан боғлиқ ишда айблаб, унга бир йиллик қамоқ жазоси ва икки йиллик шартли қамоқ жазосини тайинлаган эди. Ушбу иш бўйича яна икки судланувчи — Саркозининг собиқ адвокат Тьерри Эрзог ва собиқ прокурор Жильбер Азиберга ҳам худди шундай жазо тайинланган. Улар 2014 йилдаги «махфий эшитувлар» иши юзасидан суд қилинган эди.
Тергов маълумотларига кўра, собиқ президент адвокати орқали Азиберга Монакодаги ўрнини ваъда қилган бўлиши мумкин. Бунинг эвазига Азибер яна бир тергов тўғрисида махфий маълумотларни тақдим этиши керак эди: Саркозининг 2007 йилдаги сайловолди кампанияси L’Oreal француз компаниясининг меросхўри Лилиан Бетанкур томонидан ноқонуний равишда молиялаштирилгани ҳақидаги айбловлар билан боғлиқ маълумотлар.
Терговнинг маълумотларига кўра, 2007 йилда Бетанкур билан учрашув пайтида Саркози ундан 150 минг евро нақд пул олган. Айтишларича, у ушбу маблағни ўзининг сайловолди кампаниясини молиялаштиришга сарфлаган. Франция қонунларига кўра, номзодларга 4,6 минг евродан ортиқ миқдордаги хайрия маблағларини қабул қилиш тақиқланади.
Аввалроқ Жанубий Корея раҳбари давлат ташкилоти ходимлари билан боғлиқ коррупция можароси учун узр сўрагани, Қирғизистон Олий судининг раиси коррупцияда айбланаётгани ҳамда Бразилиянинг собиқ президентига қўйилган коррупция айбловлари бекор қилингани ҳақида хабар берилганди.
Изоҳ (0)