Мэтт Карстен исмли travel-блогер рафиқаси Анна билан Антарктида яқинида Жерлаша бўғозида амалга оширган саёҳати давомида бир нечта косатканинг пингвин ортидан қуваётганини видеога олишга муваффақ бўлди, деб ёзади The Daily Mail.
Аввалига косаткалар туристлар қайиғи атрофини ўраб олган ва ҳатто блогерлар томонидан сув остига ўрнатилган камерага ҳам қараган. Бироқ кейин йиртқичлар эътиборини ёлғиз пингвин тортган. Косаткалар узоқ вақт — пингвин қайиқ ичига сакрамагунча таъқиб этган. Буни эса амалга ошириш осон кечмаган: биринчи уринишда пингвин бортга урилиб, сувга тушиб кетган. Туристлардан бири қўли билан пингвинга ёрдам берган.
Карстеннинг сўзларига кўра, одамлар пингвинни қутқаргач, косаткалар қайиқни таъқиб эта бошлаган. «Охир-оқибат улар таслим бўлди, пингвин янги дўстлари билан хавфсизликда қолди», — дейди блогер. Пингвин яна бир мунча вақтда қутқарувчилар билан қолган, хавфсизликда эканлигини тушунгач, қайиқдан сакраб сузиб кетган.
Мавзуга доир: Кам учрайдиган сариқ пингвин илк марта бельгиялик фотограф томонидан суратга олинди (фото)
Изоҳ (0)