Англияда Оскар лақабли ит беш йилда 9 килога озиб, пандемия сабаб яна семириб кетди

Коронавирус пандемияси кўпчиликни парҳезга ўтишга мажбур қилди. Esquire’нинг ёзишича, уй ҳайвонларига ҳам бу каби муаммолар бегона эмас.

Англиянинг Вулверхэмптон шаҳрида истиқомат қилувчи 60 ёшли Карен Аллен ўзининг Оскар лақабли ити ҳақида сўзлаб берди — у бир неча йил ичида жиддий озган, бироқ пандемия сабаб яна семириб кетган.

Оскар 2016 йилдан бошлаб фаол тарзда озишни бошлаган. Авваллари унинг оғирлиги 22 килограммни ташкил этган, бу турдаги итларнинг ўртача оғирлиги — 8 килограмм атрофида.

Кареннинг сўзларига кўра, кучук бунга қадар унинг ота-онасиникида яшагани учун семириб кетган, аёлнинг отаси Оскарга жуда кўп овқат бериб келган. Аллен итнинг соғлиғи билан жиддий шуғулланган. У сузишга ёзилган ва унинг овқатланишини назоратга олган. Шу орқали Оскар 13 килограммгача (40 фоизга) вазн ташлаган.

Бироқ пандемия Оскарнинг режаларини ҳам ўзгартириб юборган. Локдаун сабабли у бассейнга бормай қўйган, шу билан бирга, унинг эгаси ҳам хотиржамликка берилган ва уни ширин егуликлар билан эркалай бошлаган.

«У семиздан озғинга айланди, кейин эса яна бироз семирди. Коронавирус сабаб унинг сузиш машқлари тўхтаб қолди, биз ҳафтасига 25 фунт тўлаётган эдик ва бу унга жуда ёқарди», — дейди Карен.

Аёл баъзида унга ширинлик беришини тан олган, пандемия вақтида эса мотивация ва шижоати сўнган. «У печенье ёки анжирли пишириқни яхши кўради. Умуман олганда, унинг севимли ширинлиги йўқ, у шунчаки очкўзлик қилади», — дейди Аллен.

Ҳозирда ит эски суратларидаги каби кўриниш олган. Оскар айнан қанчага семирганига аниқлик киритилмаган.

Аввалроқ Австралияда семиз лабрадор ташқарига чиқмоқчи бўлиб, эшикни синдириб юборгани ва интернет юлдузига айлангани тўғрисида хабар берилганди.