«Қироличанинг юриши» сериалида рол ижро этган Аня Тэйлор-Жой тобора машҳурликка эришиб бормоқда. Хўш, актриса ҳақида нималар маълум?
Аня Тэйлор-Жойнинг зодагонларга хос талаффузи, ёрқин ва бетакрор қиёфаси бежизга эмас. Онасининг келиб чиқиши испан-инглиз, отаси эса шотланд-аргентиналик. Шунинг учун ҳам унинг ўзи оқ-сариқ бўлса-да, кўзлари жигарранг.
Тэйлор-Жой АҚШнинг Майами штатида туғилган, болалиги Аргентинада ўтган. Ота-онаси уни ёшлигида Англияга олиб келган. Актриса учун испанча биринчи тил бўлиб, инглиз тилини мактабда ўрганган. Анянинг оиласи анчагина катта, унинг беш укаси ва синглиси бор.
Аня ёшлигиданиқ ижодий қобилиятини намойиш этган. У ҳикоялар ёзган, саҳналарда роль ижро этган ҳамда бошқаларнинг нутқини ифодали ўқиган. Уни мактабда кўп масхара қилишар эди, аммо актёрлик маҳорати туфайли ўз салоҳиятини рўёбга чиқарган. У ерда драматик санъат соҳасидаги мукофотни қўлга киритиб, ўзининг илк муваффақиятига эришган.
Аня болалигидан балетни яхши кўрар эди. Аммо ота-онасининг тез-тез кетиши туфайли у профессионал раққоса бўла олмади. 16 ёшга тўлганида мактабни ташлаб, актриса бўлишга қарор қилган. Айнан ўша вақтда моделлик агенти уни пайқаб қолган. Аня улар билан шартнома имзолаб, дунёга машҳур брендлар учун фотосессияларда иштирок этишни бошлаган. Суратга тушиш жараёнларидан бирида Аня актёр Аллен Лич билан танишган. Шундан сўнг у дарҳол киноларда роль ижро этишни бошлаган.
У биринчи маротаба «Жодугар» фильмидаги ижросини экрандан томоша қилганида кино унинг йўли эмаслигига ишонган. Ўшанда ўзини «даҳшатли» тарзда кўргани учун ҳам ўпкаси тўлиб йиғлаган эди. Кейинчалик картинанинг «Санденс» Америка фильмлари фестивалидаги премьерасидан сўнг матбуотдаги ижобий шарҳлар унинг фикрини ўзгартиришга ёрдам берди.
Аня Тэйлор-Жой режиссёр М.Найт Шямалан томонидан суратга олинган «Сплит» ва «Шиша» фильмларидан сўнг машҳурликка эришди. 2017 йилда Аня Канн кинофестивалида «Энг яхши актриса» учун «Трофей Шопар» компаниясининг мукофотини олган ва Британия киноакадемиясининг «Ўсаётган юлдуз» мукофотига номзод бўлган. Актриса 24 ёшидаёқ 20 дан ортиқ фильмда суратга тушишга муваффақ бўлган. Уларнинг аксарияти даҳшатли фильмлардир. Бунинг учун актриса «даҳшат маликаси» мақомига сазовор ҳам бўлган.
2020 йил 23 октябрда Netflix тақдим этган «Қироличанинг юриши» мини-сериалида Аня 1950 йилларда шахматга муҳаббат қўйган етим қиз Бет Хармон ролини ижро этган. Режиссёр Скотт Фрэнк томонидан суратга олган картинада қаҳрамон эркаклар спортининг дунёсига кириб боради ҳамда гиёҳвандликка қарши курашади.
Изоҳ (0)