Раж Капурнинг шедеври — «Бобби» фильми қандай суратга олинган? (фото)

1973 йилда суратга олинган ва нафақат Ҳиндистон, балки бошқа мамлакатларда ҳам машҳурликка эришган «Бобби» фильмининг яратилиши билан боғлиқ қизиқарли воқеаларни эътиборингизга ҳавола этамиз.

Иштирокидаги «Менинг исмим масхарабоз» фильми кутилгандек натижа қайд қилмаганидан кейин, фильм режиссёри ва бош роль ижрочиси Раж Капур тушкунликка тушган. Суратга олиш учун ганстер Карим Лаладан қарз олган Раж, уни қайтариш ҳақида бош қотира бошлаган. Қарздан қутилиши учун студияси ва рафиқасининг тақинчоқларидан воз кечишига тўғри келган. Капур оёққа туриши ва ҳаммаси изига тушиши учун хит даражасидаги фильм суратга олиши кераклигини яхши билган. Шундай вақтда унинг хаёлига дўсти, ёзувчи Аббос келган. «Жаноб 420», «Менинг исмим масхарабоз» фильмларининг сценарий муаллифи бўлган Аббос, унга ёрдам бера оладиган сюжет ҳақида ўйлаш учун 3 кун муддат сўраган. Бир неча кун ўтиб сценарий муаллифи Ражга икки ўспирин: бадавлат оиланинг ўғли ва оддий балиқчининг қизи севги ҳикояси ҳақида сўзлаб берган. Ражга ушбу ғоя жуда ҳам ёқиб тушган ва Аббосга нафақат студияни қутқарадиган, балки келажак авлоднинг ҳам ёдида қоладиган фильм олишга вада берган. Шундан кейин жамоа танлашни бошлаб юборган. Лакшмикант ва Пярелалга мусиқа, Патель, Шарма ва Ананд Бакшига шеър ёзиш вазифаси юклатилган. Фильмдаги қўшиқларни Шайлендра Синха ва Лата Мангешкар куйлаган.

Қизиғи шундаки, бир неча актриса фильмда Бобби ролини ижро қилишдан бош тортган. Режиссёр аввалига бош қаҳрамон ролини ўйнашни опаси, 70 йилларда модель сифатида яхши таниш бўлган Рекҳа — Радхага таклиф қилган. У актриса бўлишни истамагани учун рози бўлмаган. Фарида Жалол ҳам ушбу таклифни рад қилиб, фильмда унча катта бўлмаган бошқа бир қаҳрамонни гавдалантиришни афзал билган. Шунингдек, Сома Чаттержи ва Нита Сингҳ ҳам Бобби ролидан бош тортган.

Бюджет жуда кам бўлгани сабаб режиссёр машҳур юлдузларни роль ижро қилиш учун таклиф қила олмаган. Аввалига Ражеш Кҳаннанинг иштирок этишини истаган Раж, таъкидланган сабаб туфайли ҳам сериалда бош қаҳрамонларни ўғли ва дўстининг қизи ижро қилишини маъқул деб билган. Жуфтликнинг отаси ролига ўша даврнинг машҳур актёрларидан бўлган Премнатха ва Пранни таклиф қилган. Улар актёрнинг энг яқин дўстларидан бири экани сабаб, фильмда суратга тушишга розилик бериб, гонорардан воз кечган.

Салбий қаҳрамон роли эса Прем Чопрага ишониб топширилган. Аввалига ролнинг эпизодик экани сабаб иккиланган актёр, кейинроқ розилик берган. Унда актёр томонидан айтилган бир жумла, унинг карьерасига муваффақият олиб келган. 85 ёшда бўлишига қарамай, турли тадбирларда мухлис ва иштирокчилар актёрдан ушбу фильмдаги сўзларини такрорлашни илтимос қилиади.

«Менинг исмим Прем. Прем Чопра».

Интервьюлардан бирида бутун карьераси давомидаги фильмлар ва гавдалантирган қаҳрамонларидан кўра, айнан шу жумлалар сабаб кўпроқ машҳурлик, муваффақият ҳамда даромадга эга бўлганини таъкидлаган Чопра, бу буюк Раж Капурнинг даҳолигидан дарак беришини қўшимча қилган.

Жуфтлик сифатида суратга тушган Димпл Кападия ва Риши Капур эса фильм премьерасидан кейин ҳақиқий юлдуз бўлиб уйғонган. Риши роль ижро қилиш учун клиникада вазн йўқотишдан даволанган. Айнан ўша ерда у биринчи севгиси, Ясмин исмли қиз билан танишган. Матбуотда Риши ва Димплнинг муносабатлари ҳақидаги турли миш-мишлар тарқала бошлаганидан кейин Ясмин актёр билан бўлган алоқаларни узиб ташлашга қарор қилган.

Орадан йиллар ўтиб Риши ушбу фильмдаги ижроси ҳақида қуйидагича фикр билдирган: « ‘Бобби’ мен учун ўзига хос фильм бўлган. Аммо мен ушбу фильмдаги кўринишимга қарай олмайман. Шунақанги ёш ва қилтириқ бўлганманки! Ҳатто ҳозир ҳам қандай эдим-у, қандай бўлдим таққослашга уяламан. Ҳар гал телевизор орқали ‘Бобби’ намойиш қилинганда бошқа каналга оламан ёки хонадан чиқиб кетаман. Бу фильмдаги бола мен эмасман».

Фильм премьерасидан ярим йил аввал Димпл, Ражеш Кханнага турмушга чиққан. Бу вақт фильмнинг суратга олиш ишлари деярли тугаган, шунчаки клипларни якунлаш ишлари қолган, холос. Уларнинг бирида Димплнинг қўлида никоҳ хинаси борлигини кўриш мумкин.

Режиссёр кутганидан ҳам аълороқ натижага эришган, икки ёш истеъдод эгалари Риши ва Димплнинг кашф этилишига сабабчи бўлган мазкур фильм бугунги кунда нафақат Раж Капур арсенали, балки ҳинд киносаноатидаги энг яхши лойиҳалардан бири саналади.