Баъзида юлдузлар карьерасида муваффақият кузатилиши ва арсеналида қизиқарли роллар бўлиши учун ташқи кўринишига жиддий ўзгартириш киритишига тўғри келади. Лекин аёлларнинг ҳаммаси ҳам роль учун сочларидан воз кечишга рози бўлавермайди. Қуйидаги актрисалар эса бундан мустасно.
Кейт Бланшетт «Жаннат» (2002)
Австралиялик актриса 2002 йилда суратга олинган фильмда роль ижро қилиш учун кал бўлишига тўғри келган. Воқеалар ривожи Италиянинг Турин шаҳрида юз беради. Кейт унда турмуш ўртоғи ва ўқувчиларининг ўлими учун наркотиклар билан савдо қилувчи кишилардан ўч олмоқчи бўлган инглиз тили ўқитувчиси ролини ижро қилган. Уринишларидан бири қамоққа тушиш билан якунланган қаҳрамон айнан шу ерда Филиппе исмли полиция зобити билан танишади. Зобит аёлга қамоқдан қочишга ёрдам беради.
Деми Мур «Аскар Жейн» (1997 йил)
Деми Ридли Скоттнинг «Аскар Жейн» картинаси учун узун сочларидан воз кечганида бу энг муваффақиятли фильмлардан бири бўлишига умид қилган. Фильм кутилганидек чиқмаган бўлса ҳам Демининг ижроси эсда қоларли қаҳрамонлардан бири бўлган. Актриса фильмда гендер ва ижтимоий стереотипларга қарши курашган Жордан O’Нил исмли қаҳрамонни гавдалантирган. Сценарийга кўра Жордан денгиз аскарларининг сафига қўшилишга тайёр эканлигини исботлаш мақсадида сочларини қириб ташлайди.
Шарлиз Терон, «Телба Макс: ғазаб йўли» (2015)
Шарлиз Терон Жорж Миллернинг «Телба Макс: ғазаб йўли» фильмида суратга тушиш учун тилларанг кокилларидан воз кечишига тўғри келган. Сюжетга кўра у гавдалантирган Фуриоза исмли қаҳрамон беш нафар аёлни қутқаради. Журналистларга берган интервьюсида Шарлиз бу қароридан ҳеч ҳам афсусланмаслигини, бу амалиёт салбий эмоциялардан қутулишга ёрдам беришини таъкидлаган. Фильмнинг нафақат мухлислар, балки кинотанқидчилар эътирофига сазовор бўлгани эса Терон қилган қарор тўғри бўлганини исботлайди.
Сэна Латан, «Соч толасидаги бахт» (2018)
«Севги ва баскетбол» ҳамда «Блейд» сингари фильмларидаги роли билан яхши таниш бўлган Сэна Латан 2018 йилда «Соч толасидаги бахт» номли фильмда суратга тушган. Сценарийга кўра ташқи кўринишини ҳамма нарсадан устун қўядиган аёлнинг ҳаёти сочларини калга олдиришга қарор қилганидан кейин буткул ўзгаради.
Тильда Суинтон, «Доктор Стренж» (2016)
Британиялик актриса Тильда Суинтон эса Marvel томонидан суратга олинган «Доктор Стренж» фильмида роль ижро қилиш учун сочларидан айрилишга рози бўлган. Қизиғи шундаки, фильм экран юзини кўрмагунича актрисанинг образи сир сақланган. Образнинг ишонарли чиқиши учун кал бўлиш таклифи продюсер ва режиссёр қолиб, актрисанинг ўзидан чиққан.
Карен Гиллан, «Галактика қўриқчилари» (2014)
Гиллан эса 2014 йилда суратга олинган «Галактика қўриқчилари»да роль ижро қилиш учун ушбу қарорга келган. Актрисанинг янги образи кутилмаган бўлган. Сан-Диегодаги конференция вақтида бошидаги парикни ечганида атрофдагилар лол қолган. Маълум бўлишича, ҳали кастингда иштирок этишидан аввалроқ мазкур қаҳрамонни гавдалантириш учун актриса кал бўлиши кераклиги ҳақида огоҳлантирилган. Карен бундай талабдан чўчимаган, аксинча буни қизиқарли тажриба деб қабул қилган.
Персис Хамбата «Самовий йўл (1979)
Ҳинд актрисаси Персис мазкур фильмда иштирок этиш учун ташқи кўриниши билан боғлиқ муҳим қарор қабул қилишига тўғри келган. Аёлларнинг нафақат ҳаётда, балки экранда ҳам кал кўриниши одатий бўлмаган бир пайтда мухлислар актрисанинг мазкур образини кўриш учун кинотеатрларга ташриф буюрган. «Самовий йўл», «Ҳиндистон гўзали» ижросидаги энг муваффақиятли фильмлардан бири бўлганига қарамай, кейинчалик унинг арсеналида бошқа пичоққа илинадиган фильм бўлмаган.
Изоҳ (0)