Koronavirus pandemiyasi ko‘pchilikni parhezga o‘tishga majbur qildi. Esquire’ning yozishicha, uy hayvonlariga ham bu kabi muammolar begona emas.
Angliyaning Vulverxempton shahrida istiqomat qiluvchi 60 yoshli Karen Allen o‘zining Oskar laqabli iti haqida so‘zlab berdi — u bir necha yil ichida jiddiy ozgan, biroq pandemiya sabab yana semirib ketgan.
Oskar 2016-yildan boshlab faol tarzda ozishni boshlagan. Avvallari uning og‘irligi 22 kilogrammni tashkil etgan, bu turdagi itlarning o‘rtacha og‘irligi — 8 kilogramm atrofida.
Karenning so‘zlariga ko‘ra, kuchuk bunga qadar uning ota-onasinikida yashagani uchun semirib ketgan, ayolning otasi Oskarga juda ko‘p ovqat berib kelgan. Allen itning sog‘lig‘i bilan jiddiy shug‘ullangan. U suzishga yozilgan va uning ovqatlanishini nazoratga olgan. Shu orqali Oskar 13 kilogrammgacha (40 foizga) vazn tashlagan.
Biroq pandemiya Oskarning rejalarini ham o‘zgartirib yuborgan. Lokdaun sababli u basseynga bormay qo‘ygan, shu bilan birga, uning egasi ham xotirjamlikka berilgan va uni shirin yeguliklar bilan erkalay boshlagan.
“U semizdan ozg‘inga aylandi, keyin esa yana biroz semirdi. Koronavirus sabab uning suzish mashqlari to‘xtab qoldi, biz haftasiga 25 funt to‘layotgan edik va bu unga juda yoqardi”, — deydi Karen.
Ayol ba’zida unga shirinlik berishini tan olgan, pandemiya vaqtida esa motivatsiya va shijoati so‘ngan. “U pechenye yoki anjirli pishiriqni yaxshi ko‘radi. Umuman olganda, uning sevimli shirinligi yo‘q, u shunchaki ochko‘zlik qiladi”, — deydi Allen.
Hozirda it eski suratlaridagi kabi ko‘rinish olgan. Oskar aynan qanchaga semirganiga aniqlik kiritilmagan.
Avvalroq Avstraliyada semiz labrador tashqariga chiqmoqchi bo‘lib, eshikni sindirib yuborgani va internet yulduziga aylangani to‘g‘risida xabar berilgandi.
Izoh (0)