Сирдарё вилояти молия бош бошқармаси маъмурий биносида ёнғин юз берди

Гулистон шаҳрида жойлашган Сирдарё вилояти молия бош бошқармаси маъмурий биносида ёнғин юз берди.

Вилоят Фавқулодда вазиятлар бошқармаси матбуот хизматининг хабар беришича, ёнғин 7 март куни соат 00:30 да «Шодлик» МФЙда жойлашган Сирдарё вилояти молия бош бошқармаси котиб (қабулхона) хонасида содир бўлган.

Ҳодиса оқибатида хонанинг, тахминан, 35 квадрат метр майдонида шифт қисми ва хона жиҳозлари зарарланган. Воқеа жойига Гулистон шаҳар ФВБнинг 2 та ёнғин-қутқарув экипажлари соат 00:35 да етиб бориб, ёнғин соат 00:55 да тўлиқ ўчирилган. Ёнғиндан бинонинг, тахминан, 400 квадрат метр майдони сақлаб қолинган.

Ёнғин сабаби ва моддий зарар миқдори аниқланмоқда.

Аввалроқ Тошкентдаги кафе ёқиб юборилиши оқибатида беш киши — икки нафари эркак, уч нафар аёл ҳалок бўлгани, қасддан ёқиб юборган шахс ушлангани ҳақида хабар берилганди. Ҳолат юзасидан жиноят иши қўзғатилиб, тергов ҳаракатлари олиб борилмоқда.

Шунингдек, Марғилондаги Мустақиллик кўчасида жойлашган тўртта дўконда, Жиззахдаги пластмасса қувурлар ишлаб чиқарувчи корхонада, Нукусда эшик ишлаб чиқариш цехида ёнғин юз бергани ҳақида хабар берилганди.