2021 йилда Тошкентнинг йўл инфратузилмаси ва ички марказий кўчаларини таъмирлашга 467,3 миллиард сўм йўналтирилади, деб хабар беради «Подробно».
Маълумотларга кўра, бевосита йўл қопламаларини таъмирлашга 221,6 миллиард сўм (унинг 74,7 миллиарди — давлат, 146,9 миллиард — маҳаллий бюджетдан) ажратилади. Амалга ошириладиган ишлар дастуридан шаҳардаги 155 та маҳалладан ўтувчи 68 та марказий ва 269 та ички йўл ўрин олган.
Тошкент шаҳар ҳокимининг архитектура, капитал қурилиш ва коммуникацияларни ривожлантириш масалалари бўйича биринчи ўринбосари Бахтиёр Раҳмоновнинг маълум қилишича, асосий эътибор ички йўлларни таъмирлашга қаратилади.
«Сўнгги ўн йилдан буён ушбу йўлларга ҳеч ким эътибор қаратмади. Уларга қўл тегмади, маблағ йўқ эди. Жорий йилда эса ажратилган маблағларнинг 60 фоизга яқини ички йўлларни асфальтлашга кетади. Табиийки, марказий йўлларга ҳам, мисол учун, Фарғона йўли. Бекатлар ўзгаради, улар дўконсиз бўлади, фақат йўловчилар учун мўлжалланади, умуман инфратузилма ўзгаради», — дейди Раҳмонов.
Шунингдек, ҳоким ўринбосарининг қўшимча қилишича, ҳозирда янги технологиялардан фойдаланган ҳолда иккита кўприк қурилмоқда. «Бу каби кўприклардан шаҳарда 20 тача бўлади. Уларнинг нархи ҳар бири учун 2,5 миллиард сўмдан ортиқ», — дейди у.
Бундан ташқари, Бахтиёр Раҳмонов бир километр йўлни таъмирлаш қанчага тушиши ва у қанча вақт хизмат қилиши борасидаги саволга ҳам жавоб берган.
«Кесимлар жиҳатидан олинадиган бўлса, магистрал, марказий ва ички кўчалар мавжуд. Ҳар бирининг ‘масаллиғи’ ўзгача. Улар шебен, шағал, қум зарралари ва ҳоказолардан таркиб топган. Ҳалқа йўлининг бир километри ўртача 1 миллион доллар туради. 65 мингдан 100 минг долларгача — таъмирлаш, асфальт қопламалари. Хизмат қилиш муддати — 15 йилдан кам эмас», — дейди пойтахт ҳокими ўринбосари.
Эслатиб ўтамиз, 2020 йилда Тошкент йўлларини яхшилашга салкам 493 миллиард сўм йўналтирилган. Хусусан, йил давомида жами узунлиги 111,6 километр бўлган 318 та кўчаларда қурилиш, мукаммал ва жорий таъмирлаш ишлари олиб борилган.
Изоҳ (0)