Гарварднинг Америка сиёсий тадқиқотлар маркази (Harvard CAPS) ва Harris Poll компаниясининг сўровномаларига кўра, АҚШ аҳолисининг деярли 41 фоизи COVID-19’га қарши эмланишни истамайди. Бу ҳақда The Hill нашрига таяниб «Интерфакс» хабар берди.
Сўровнома натижаларига кўра, қатнашчиларнинг 59 фоизи коронавирус инфекциясига қарши эмланишга қарши эмас.
Вакцина олишни истамаётганларнинг 66 фоизи коронавирусга қарши препаратнинг ножўя таъсиридан хавотирда бўлса, қолган 33 фоизи вакцинани самарасиз деб ҳисоблайди. Шунингдек, сўровнома иштирокчиларининг 27 фоизи вирусдан қўрқмаслигини, 23 фоизи биринчи навбатда хавф остидаги гуруҳ эмланиши кераклигини, 17 фоизга яқини эса саломатлигида пайдо бўлиши мумкин бўлган муаммолардан хавотирда эканини айтган.
«Бу ой ўтказилган сўровномадаги энг ачинарли ҳолат шуки, вакцина олмаган ҳар ўн кишининг тўрттаси эмланишни истамаяпти», — деди тадқиқот директори Марк Пенн.
The Hill нашрининг ёзишича, вакцина яратишдаги муваффақият, тиббий ниқоб тақиш ва ижтимоий масофа сақлаш мажбурияти орқали АҚШда коронавирус пандемиясига қарши кураш жараёни изчил давом этаётганига қарамай, COVID-19’нинг янги штаммлари барча уринишларга салбий таъсир ўтказиши мумкин.
«Илтимос, менга қулоқ солинг: биз вируснинг кенг тарқалаётган турларининг бундай даражасида қийинчилик билан эришган барча марраларимизни бой беришимиз мумкин», — деди АҚШнинг Касалликларни назорат қилиш ва профилактика марказлари директори Рошел Валенски.
Harvard CAPS-Harris Poll компанияларининг сўровномаси 23 февралдан 25 февралгача ўтказилди, унда 2006 та иштирокчи қатнашди.
27 февралда АҚШнинг Озиқ-овқат ва дори-дармон назорати агентлиги (FDA) COVID-19’га қарши Johnson & Johnson компаниясининг бир дозали вакцинасини маъқуллади.
Аввалроқ АҚШда Pfizer-BioNTech ва Moderna компанияларининг вакциналари маъқуллаган эди, бу вакциналар икки дозадан юборилади.
Пандемия бошидан буён АҚШда 29,3 миллиондан ортиқ вирус билан касалланиш ҳолати аниқланди, уларнинг 527 мингдан кўпроғи вирус қурбонига айланди.