Австрияда 41 нафар одам Pfizer ва BioNTech вакцинаси билан эмланганидан кейин вафот этди. Бу ҳақда мамлакат соғлиқни сақлаш соҳасида хавфсизлик бўйича федерал идораси маълумотига таяниб «РИА Новости» хабар қилди.
Шунга қарамай, шифокорлар беморларнинг ўлимига вакцинациянинг алоқадорлик жиҳатини аниқламаган.
Ҳисоботда қайд этилишича, уч нафар бемор танаси ёриб кўрилганидан кейин ўлимга эмлашнинг алоқадорлиги ҳақидаги тахмин ўзини оқламаган. Яна 11 нафар бемор коронавируснинг инкубацион даври вақтида вакцинация қилингани туфайли инфекция асоратлари оқибатида вафот этган. Қолган 19 нафар беморда бошқа касалликлар мавжуд бўлган ва шу сабабли ҳам ўлим ҳолати кузатилган. Яна саккиз нафар кишининг ўлими сабабларига аниқлик киритилмоқда.
Европа ваколатли органи 2020 йил 21 декабрда Иттифоқ бозорига Pfizer ва BioNTech вакцинасини киритиш юзасидан қарор чиқарган. Еврокомиссия шу куннинг ўзида вакцинадан фойдаланишни маъқуллаган, бир неча кундан кейин эса препаратни Европа Иттифоқи мамлакатларига етказиб бериш ишлари бошлаб юборилганди.
Австрияда аҳолини коронавирусга қарши эмлаш ишлари 2020 йил 27 декабрда бошланган.
Аввал Швейцарияда 16 киши коронавирусга қарши эмлангандан сўнг вафот этгани, шунингдек, Грецияда COVID-19’га қарши эмланганларда жиддий асоратлар кузатилгани ва 85 ёшли эркак COVID-19’га қарши эмланганидан кейин вафот этгани ҳақида хабарлар берилган.
Норвегияда ҳам АҚШнинг Pfizer компанияси ва унинг Германиядаги шериги BioNTech томонидан ишлаб чиқилган коронавирусга қарши вакцина билан эмланган икки киши вафот этган.
Изоҳ (0)