Футбол тарихида ўз клубига 15 йилдан кўпроқ умрини сарфлаган кўплаб футболчилар бор, аммо улар фаолиятининг охирига келиб, барибир нисбатан кучсизроқ чемпионат ёки жамоага йўл олади. Бундай футболчилар сирасига Стивен Жеррард, Жон Терри, Хави, Андрес Иньеста, Икер Касильяс ва бошқаларни киритиш мумкин. Аммо ҳозир ўзини фақат бир жамоага бағишла(ёт)ган футболчилар ҳақида фикр юритамиз.
Лионель Месси — «Барселона»
Месси 13 ёшидан бери «кўк-анорранглилар» тизимида бўлиб келмоқда. 2003 йилда асосий жамоада дебют қилган Лео бу вақт оралиғида 763 та ўйин ўтказиб, 658 та гол урди ва 34 та соврин қўлга киритди. Бунга яна ўнлаб шахсий мукофотларни ҳам қўшиш мумкин. Инкор этиб бўлмайдиган бир жиҳат борки, бугунги кунда «Барселона» деганда исталган инсон биринчи навбатда Мессини эслайди. Аргентиналикнинг каталон клуби билан шартномаси эса 2021 йилнинг 30 июнига қадар амал қилади. «Ўзга сайёралик» клубда қолиш ё кетиши фақатгина вақт масаласи бўлиб турибди. Воқеалар ривожи қандай кўриниш олишидан қатъи назар Месси «Барселона» тарихидаги энг яхши ҳужумчи бўлиб қолаверади.
Серхио Рамос — «Реал»
Рамос профессионал футболдаги илк қадамларини «Севилья»да бошлаган. Марказий ҳимоячи 2005 йилда, 19 ёшида «Реал»га ўтади. Рамос Мадридда ўтказган 16 йили давомида «қаймоқранглилар» билан 22 та соврин ютди. У 713 та учрашувда майдонга тушиб, ўз ҳисобига 103 та гол ёздириб қўйган. Бундан ташқари Мадрид ҳимоя қўрғони Ла Лигада энг кўп сариқ карточка қайд этиш бўйича ҳам рекордчи ҳисобланади. Аммо 2020/21 йилги мавсум якунида унинг «қироллик клуби» билан шартномаси якунига етади, янги шартномадан эса ҳозирча дарак йўқ.
Марсело — «Реал»
Аксарият бразилиялик иқтидорлар сингари Марсело ҳам анчайин ёш вақтида Европага йўл олган. 2007 йилда, 18 ёшида «Реал»га ўтган Марсело ортда қолган вақт мобайнида «қаймоқранглилар» сафида 530 та ўйин ўтказган ва 21 та соврин қўлга киритган. Унинг «Реал» сафидаги голлари сони эса 38 тани ташкил қилади. Умуман олганда, бразилиялик Мадридда жуда ажойиб мавсумларни (14 йил) ўтказди. Бироқ сўнгги пайтларда унинг клубдаги ишлари унчалик ҳам юришмаяпти, Зинедин Зидан уни асосан захирада қолдиришни афзал кўрмоқда. Марселонинг «Реал» билан шартнома 2022 йилнинг ёзида ўз ниҳоясига етади, бироқ у катта эҳтимол билан 2020/21 йилги мавсум якунида жамоани тарк этса керак. Афсуски, «Реал» ўз афсоналари билан муносиб хайрлашишни билмайди...
Франческо Тотти — «Рома»
Тотти ҳақида тўхтовсиз гапириш мумкин. Профессионал фаолиятини 1992 йилда «Рома»да бошлаган Франческо бутсаларини ҳам айнан Рим клубида (2017 йилда) михга илади. У бошқа жамоада ўйнаш вариантини ҳатто ўйлаб ҳам кўрмаган ва доимо жамоасига содиқлигини айтиб келди. Шу сабабли унга «Император» лақаби берилади, Тотти эса бу номни ортиғи билан оқлайди. Тотти «Рома» билан 5 та совринга эга чиққан, тўғри, буни кимдир 25 йил учун кам дейиши ҳам мумкин, аммо римликлар ҳар доим ҳам ўзининг юлдузли таркиби ва катта молиявий имкониятлари билан мақтана олмаган. «Рома» таркибида 758 та ўйинда 307 та гол урган Тоттига ўз вақтида гранд жамоалардан таклифлар бўлган. Аммо «Император» уларнинг барчасини рад этиб келган. Ана шундай таклифлардан энг эсда қоларлиси 2005 йилда шахсан «Реал» президенти Флорентино Перес томонидан бўлганди. Перес ўша даврлар ҳисобларига кўра Франческога «космик» маош ваъда қилади. Тотти эса ўйлаб ҳам ўтирмасдан Роберто Карлос, Зидан, Гути, Бекҳэм, Рауль ва Роналдо сингари футболчилар билан бир жамоада ўйнаш имкониятидан воз кечади.
Бу воқеадан кўп йиллар ўтгач Флорентино Перес шундай деганди: «Тотти менинг таклифимни рад этган ягона футболчи».
Паоло Мальдини — «Милан»
Футбол тарихида Паоло Мальдини сингари ўйинчилар жуда кам. Чунки Мальдини нафақат фаолияти, балки ҳаёти давомида фақат бир клуб шарафини ҳимоя қилган. У ўзи тарбияланган «Милан»нинг асосий жамоасида 25 йил (1984—2009 йиллар) ўйнашдан ташқари ҳозирда клубнинг техник директори ҳам ҳисобланади. Шу вақт мобайнида у «россонери» билан 26 та совринга эга чиқди. Мальдини нафақат «Милан», балки футбол афсонаси сифатида ҳам миллионлар ўйини тарихида ўзининг ўчмас изини қолдирган. Мальдинининг «Милан»даги статистикаси қуйидагича: 901 ўйин, 33 та гол.
Бошқа мақолалар:
Изоҳ (0)