Bir futbolchi tarixi. “Real”dan badarg‘a qilingan “billur oyoq”li Garet Beyl haqida

Garet Beyl 2021-yilning fevral oyi o‘rtalariga qadar “Tottenhem” tarkibida atigi 17 uchrashuvda qatnashib (“shporlar” 41 uchrashuv o‘tkazgan), atigi 783 daqiqa harakat qildi, shu bilan birga shundan 50 foizdan ko‘prog‘i Yevropa Ligasi o‘yinlariga to‘g‘ri keldi. Premyer Ligada ham uelslik juda kam daqiqalarga ega bo‘layotgandi. Ko‘pchilik Garetning Angliya Kubogi doirasida o‘tkazilgan “Everton”ga qarshi o‘yinda maydonga tushishini kutgandi, ammo u “Tottenhem”ning o‘yin uchun qaydnomasidan ham o‘rin olmadi. “Shporlar” bosh murabbiyi Joze Mourinyo o‘yindan so‘ng bunga quyidagicha izoh berdi:

“Yakshanba kuni biz “Vest Bromvich”ga qarshi o‘ynadik va Garet butun o‘yinni zaxira o‘rindig‘ida o‘tkazdi. Dushanba kuni men uning o‘zini noqulay his qilgani tufayli tekshiruvdan o‘tmoqchi ekanligini bilganimda juda hayron bo‘ldim. U dushanba kuni biz bilan mashg‘ulot o‘tkazmadi, seshanba kuni qaytdi, ammo yana bir necha kun davomida shifokorlar bilan ishlashni xohlayotganini aytdi. Shuning uchun u bugun biz bilan birga bo‘lmadi. Beylning aniq jarohati yo‘q, ammo u o‘zini noqulay his qilmoqda va mashg‘ulot ritmiga ham ega emas”.

Ammo Garet kutilmaganda “Tottenhem”ning so‘nggi o‘yinlarida faollashib qoldi. U Yevropa Ligasi 1/16 final bosqichi javob uchrashuvida “Volfsberg”, Angliya Premyer Ligasida (26-tur) esa “Byornli” darvozasini ishg‘ol (dubl) etdi va o‘zi haqida bildirilayotgan tanqidlarga javob qaytardi.

Ammo jarohatlar bilan ovora bo‘lish super yulduzga aylanishi kutilgan futbolchining hayot tarziga aylanib ulgurdi. To‘g‘ri, har bir futbolchiga ham Chempionlar Ligasida g‘alaba qozonish va eng nufuzli musobaqa finalida 3 ta gol urish nasib etavermaydi, ammo Garet o‘zi loyiq bo‘lgan cho‘qqilarni zabt etmaganligi kundan kunga aniqlashib bormoqda. Quyida Garet Beylning butun faoliyatiga nazar tashlanadi va uning qay tarzda bu ahvolga tushib qolgani haqida hikoya qilinadi.

“Sauthempton”

2006-yil 17-aprel kuni 16 yoshli Garet Beyl “Sauthempton” safida o‘zining katta futboldagi debyut o‘yinini o‘tkazadi. Yosh futbolchi Chempionship doirasida o‘tkazilgan “Milluoll”ga qarshi o‘yinda chap qanot himoyachisi sifatida 90 daqiqa harakat qiladi. Keyingi mavsumda esa Beyl “avliyolar”ning asosiy o‘yinchisiga aylanadi. Uelslik futbolchi Chempionshipning 38 uchrashuvida maydonga tushib, o‘z hisobiga 5 ta gol va 11 ta golli uzatmani yozdirib qo‘yadi.

“Tottenhem”ga o‘tish

“Sauthempton” chempionatda oltinchi o‘rinni egallaydi. Premyer Ligaga chiqish uchun pley-offning yarim final o‘yinida esa “Derbi Kaunti”ga penaltilar seriyasida imkoniyatni boy berib qo‘yadi. Ammo bu Beylning “Tottenhem”ga (5 million funt evaziga) o‘tishiga to‘sqinlik qila olmaydi. Garet yangi klubida ham birdaniga yorqin o‘yinlar ko‘rsata boshlaydi, ammo shu orada jarohat olib safdan chiqadi.

Beyl jarohatidan tezda forig‘ bo‘ladi, ammo uning o‘z formasini tiklab olishi qiyin kechadi va “shporlar”ning asosiy tarkibiga kira olmaydi. Keyingi mavsum ham futbolchi uchun qiyinroq kechadi, chunki Beyl tizzasidagi operatsiya tufayli mavsumoldi tayyorgarlik jarayonlari va chempionat startini o‘tkazib yuboradi. Uelslik futbolchi faqat yanvar oyiga kelibgina, muntazam ravishda o‘ynay boshlaydi. Chap qanot himoyasi va yarim himoyada o‘ynagan Beyl mavsum oxiriga kelib gol+pas tizimi bo‘yicha 8 ochko (3+5) qayd etadi.

2010/11-yilgi birinchilik esa Garetning “Tottenhem”dagi dastlabki yorqin mavsumi bo‘ladi, chap qanot yarim himoyasiga o‘tgan futbolchi 11 ta gol uradi va 11 ta golli uzatmani amalga oshiradi. Chempionlar Ligasidagi “Inter”ga qarshi o‘yindagi het-trikdan so‘ng unga kimsan “Real”ning o‘sha paytdagi bosh murabbiyi Joze Mourinyo qiziqayotgani haqidagi xabarlar paydo bo‘ladi. Garetning braziliyalik jamoadoshi Eurelio Gomesh esa uni texnik tomondan vatandoshlari bilan taqqoslaydi:

“Garetning o‘yinida Braziliya notalari bor. O‘ylashimcha, u shunchalik yaxshi o‘ynaydiki, Braziliya terma jamoasida ham o‘ynashi mumkin edi”.

2011/12-yilgi mavsumda Beylning ko‘rsatkichlari ko‘tariladi, “Barsa” va “Real” skautlari uelslik futbolchini diqqat bilan kuzatishni boshlaydi va bunda kataloniyaliklarning imkoniyatlari yuqori baholanadi. Mavsum oxiriga kelib, Garetning o‘zi ham ispan grandlarining taklifidan faqat mamnun bo‘lishini tan oladi. Keyingi mavsum esa Garet uchun tom ma’noda eng omadlisi bo‘ladi, u Andre Villash-Boash boshchiligida o‘z imkoniyatlarini to‘liq namoyish etadi va “shporlar”ning yetakchisiga aylanadi. Buni uning 25 ta goli va 15 ta golli uzatmasi ham tasdiqlab turibdi. O‘sha paytda sobiq futbolchi Maykl Douson Garet haqida shunday degandi:

“U o‘z imkoniyatlari bilan Ronaldu va Messiga tenglasha oladi. Garet dunyoning eng yaxshi futbolchilaridan biridir. Ehtimol, Beyl hozir dunyoning eng yaxshi futbolchisi bo‘lishi ham mumkin. Beylning ba’zi aqlbovar qilmas harakatlari Krishtianuni ham qizartirib yuborishi mumkin”.

“Real”ga o‘tish

2013-yilning yozgi transferlar oynasidagi uzoq va qiyin muzokaralardan so‘ng Garet Beyl o‘sha paytdagi rekord summa — 101 million yevro evaziga “Real”ga ko‘chib o‘tadi. Uelslik futbolchi o‘ziga xalaqit bergan kichik jarohatlarni inobatga olmaganda, Madriddagi debyut mavsumini ancha muvaffaqiyatli o‘tkazadi. U o‘zining “qaymoqranglilar” safidagi dastlabki golini debyut uchrashuvidayoq uradi. 44 bellashuvda maydonga tushgan Garet mavsum so‘ngiga kelib, 22 ta gol va 19 ta assistni amalga oshiradi. Ispaniya Kubogi finalida “Barselona”, Chempionlar Ligasi hal qiluvchi o‘yinida esa “Atletiko” darvozasiga g‘alaba to‘plarini kiritadi. Jamoaning o‘sha paytdagi bosh murabbiyi Karlo Anchelotti Beyldan mamnun ekanligini va uning bundan ham yaxshiroq ishlashi mumkinligini ta’kidlaydi.

Garet Beyl yangi mavsum boshlanishida oldin Krishtianu Ronalduning istehzoli tabassumiga sabab bo‘lgan bir fikrni bildiradi:

“Joriy mavsumda men “Oltin to‘p”ni qo‘lga kiritmoqchiman, shuningdek, “Real” bilan barcha turnirlarda g‘olib chiqishni istagan bo‘lardim. Men “qirollik klubi” dunyoning eng yaxshi jamoasi bo‘lishini xohlayman”.

2014/15-yilgi mavsumni Beyl jamoaning asosiy yulduzlaridan biri sifatida boshlaydi, ammo “Real” ushbu futbol yilida hech qanday sovrinsiz qoladi. Karlo Anchelotti esa o‘z vazifasidan ozod etiladi. Garet o‘tgan mavsumdagi ko‘rsatkichlarini yaxshilay olmaydi va ko‘plab uchrashuvlarda jamoani orqaga tortayotgandek taassurot uyg‘otadi. Ispaniya matbuoti uelslikning Ramos va Ronaldu bilan yomon munosabatlarda ekanligi haqida yozayotgan bir paytda, klub rahbariyati unga katta umid bildirishda davom etadi. “Qaymoqranglilar” Rafael Benites boshchiligida mavsumning birinchi yarmini boy berib qo‘ygach, jamoa boshqaruviga Zidan keladi va Chempionlar Ligasidagi g‘alabani ta’minlaydi. Garet “matraschilar”ga (“Atletiko”) qarshi kechgan Chempionlar Ligasi final o‘yinida 120 daqiqa harakat qilib, Serxio Ramosga golli uzatmani amalga oshiradi va o‘yindan keyingi penaltini aniq ijro etadi.

2016-yilning oktabr oyida Beyl Madrid klubi bilan shartnomasini 2022-yilgacha uzaytirgach, bir necha kundan so‘ng sonini jarohatlab oladi va 4 oyga safdan chiqadi. Aprel oyiga kelib esa Garet Madrid tarkibidagi 100-o‘yinini o‘tkazib, yubileyini ham navbatdagi jarohati bilan “nishonlaydi”. Chempionlar Ligasi finalida “Yuventus”ga qarshi bahsda Garet zaxirada qoladi va faqat 77-daqiqaga kelibgina maydonga tushadi. Va shunda ham Zidan unga ishonishda davom etadi: “Beyl maydonga tushganda “Real” yaxshiroq o‘ynay boshlaydi”, — degandi fransuz.

2017/18-yilgi mavsum — Garet uchun faoliyatidagi so‘nggi muvaffaqiyatli yil bo‘ladi: barcha musobaqalarda 21 ta gol va 7 ta golli uzatma. Shuningdek, Chempionlar Ligasi finalida “Liverpul” darvozasini ajoyib tarzda ishg‘ol qiladi. Ammo Beyl shu mavsumning o‘zida sezilarli darajada pastga sho‘ng‘iydi. Zidan uning o‘rniga ko‘proq Isko va Asensioga ishonch bildiradi va mavsum oxirida undan qutulishni ko‘zlaydi. Ammo shu vaqtda Zidan va Ronaldu “qirollik klubi”ni tark etishi haqida e’lon qiladi. Shu tariqa Beyl Madridning asosiy yulduziga aylanib qoladi. Ammo “Real” singari u ham o‘sha mavsumda o‘ziga yuklatilgan vazifasini bajara olmaydi. Zidanning o‘rniga kelgan Xulen Lopetegi ishdan bo‘shatilgach, Santyago Solari boshqaruvni o‘z qo‘liga oladi, ammo uning sarguzashtlari ham hech qancha davom etmaydi. Zidan o‘z vazifasiga qaytganidan keyin esa Garet uning rejalariga kirmasligini aniq qilib aytadi. Beyl maydonga chiqqanda esa muxlislar uni hushtaklar bilan kutib olardi. Beylning agenti Zidanni “uning ketishi hamma uchun yaxshi bo‘ladi” degan gaplari uchun unchalik yaxshi bo‘lmagan so‘zlar bilan “siylagandi”. Munosabatlar qayta tiklanmasligi aniq edi, ammo Garet baribir daromadli shartnoma bilan Madridda qolishga qaror qiladi.

2019/20-yilgi mavsumda Zidan Beylga ishonishga va’da berdi, ammo Garet bu yilda o‘zini to‘laligicha golfga bag‘ishladi. O‘ziga berilgan imkoniyatlardan esa umuman foydalanmadi — 20 ta o‘yin, bor-yo‘g‘i 3 ta gol va 2 ta golli uzatma. Ushbu mavsumda u ko‘proq zaxira o‘rindig‘idagi xurmacha qiliqlari bilan yodda qoldi. Bu “Oltin to‘p”ni yutmoqchi bo‘lgan 100 million yevrolik futbolchining “qirollik klubi”dagi natijalari edi.

“Tottenhem”ga qaytish (ijara)

Zidan bilan tamomila munosabatlari buzilgan va “Real”da begona bo‘lib qolgan Beylning Londonga qaytish orqali faoliyatini qayta tiklashi kutilgandi. Ammo bu yerda ham u umidlarning hech birini oqlamadi (so‘nggi 2 ta o‘yinni inobatga olmaganda, albatta). Jarohatlar yana pand bera boshladi, buning ustiga Beylning o‘zi ham tishini tishiga qo‘yib, taqdiri uchun kurashadigan inson emasligi ko‘rinib qoldi. Uning “Tottenhem”da o‘ynab ketishi ham so‘roq ostida turibdi, boisi Mourinyoning (ham) undan hafsalasi pir bo‘lgani aytilmoqda.