Telegram компаниялари гуруҳи молиявий зарар кўрмоқда, унинг активлари мажбуриятларни қоплай олмаяпти. Аввал «Коммерсантъ» қайд этганидек, агар гуруҳ облигациялар чиқармаса у ҳолда қарзларини қоплай олмайди. Бу ҳақда Telegram’нинг 2018—2020 йиллардаги молиявий ҳисоботи билан танишган VTimes нашри маълумот берган.
Telegram’нинг 2018 йилдаги зарари 172,7 миллион долларни, 2019 йилдагиси эса 150,9 миллион долларни ташкил этган. Гуруҳ мажбуриятлари унинг активларини 2018 йилда 245 миллионга ва 2019 йилда 418 миллиондан зиёд бўлган. Аудиторлар Telegram’нинг бундай кўрсаткичлар билан танаффусларсиз фаолият олиб бора олишига шубҳа билан қарамоқда. 2020 йилнинг биринчи ярмида гуруҳда 172 миллион долларлик дефицит сақланиб қолганди. Ҳисоботларга кўра икки ярим йил ичида Telegram операцион фаолиятдан, умуман, даромад олмаган.
Telegram облигациялардан тушган маблағнинг асосий қисмини қарзларни қоплашга сарфламоқчи (гуруҳ 30 апрелгача қарийб 626 миллион долларни Telegram Open Network (TON) блокчейн-платформаси инвесторларига қайтариши лозим), ортиб қолган пуллар операцион фаолиятни давом эттиришга йўналтирилади. Яқин йилларда Telegram монетизациянинг янги ва турлича усулларини жорий қилмоқчи, жумладан, каналларда реклама постларини жойлаштириш, мукофотли стикерлар савдоси, корпоратив мижозлар учун қўшимча хизматлар ва реклама билан интеграциялашган қисқа видеолар (Instagram’даги stories анологи бўлади) таклиф қилиниши режалаштирилган.
Telegram инвесторлардан операцион фаолиятдаги молиявий муаммоларни яширмаяпти ва гуруҳ ушбу ҳолатдан чиқиб кетиш учун қандай йўлларни танлаши ҳақида ҳам маълумот бериб келмоқда. Telegram қисқа бизнес тарихига эга ва янги бизнес-модель, шу сабабли ҳам унинг келажагини олдиндан башорат қилиш мушкул, монетизациянинг стратегияси ишламай қолиши ҳам мумкин, дея инвесторларни огоҳлантирган гуруҳ.
18 февралда «Коммерсантъ» ўз манбаларига таяниб, Telegram Group Inc’нинг Россия, Европа ва Осиёдаги инвесторларнинг чекланган сонини жалб қилиб миллиард доллар киритишни режалаштирганини хабар қилган. Облигациялар беш йилга чиқарилади, ҳар йили қарз миқдорининг 7-8 фоизи купон тарзида тўлаб борилади.
2018 йилда Telegram TON блокчейн-платформасининг Gram криптовалютаси учун 1,7 миллиард доллар инвестиция жалб қилган. Ушбу лойиҳа АҚШ қимматли қоғозлар комиссияси томонидан блокланган, ташкилот мессенжернинг қонунчиликка зид тарзда қимматли қоғозларни сотаяпти деб ҳисоблаган.
Изоҳ (0)