Tesla ва SpaceX компаниялари раҳбари Илон Маск бир кеча-кундузда 15 миллиард доллар йўқотди ва дунёнинг энг бой одами мақомидан маҳрум бўлди. Бу ҳақда The Economic Times хабар берди.
Фото: Legion Media
Tesla акцияларининг баҳоси 8,6 фоизга пасайиши туфайли бизнесменнинг бойлиги 183 миллиард долларга тушди. Таъкидланишича, бунга тадбиркорнинг биткоин нархига билдирган муносабати сабаб бўлиши мумкин.
Илон Маск 20 февраль куни Twitter’да биткоин ва эфериум криптовалюталари нархи ҳаддан ташқари ошиб кетгани ҳақида твит қолдирганди. Ҳар қандай маълумотлар тизими сингари криптовалюталар ҳам кечикувчи жавоблар ва хатоларга мойил, дея қўшимча қилган у. Шу билан бирга, мазкур твитдан икки ҳафта олдин Tesla 1,5 миллиард доллар миқдорида биткоин сотиб олганини эълон қилган.
Эслатиб ўтамиз, 19 февралда Илон Маск дунёдаги энг бой кишилари рейтингида биринчи ўринга қайтди. Ўшанда тадбиркорнинг бойлиги 199,9 миллиард долларга етган. Ҳозирда биринчиликни Amazon асосчиси Жефф Безос эгаллаб турибди, унинг бойлиги 186 миллиард долларга баҳоланмоқда.
Аввалроқ Илон Маскнинг электромобиллар ишлаб чиқарувчи Tesla компанияси 2020 йилнинг тўртинчи чорагида 270 миллион, йил давомида эса жами 721 миллион доллар соф фойда кўрганини маълум қилган эди. Tesla ўз тарихида биринчи марта йил давомида зарар кўрмади. Таққослаш учун, компания 2019 йилда 862 миллион доллар миқдорида соф зарарни қайд этган. Бироқ, хабарга кўра, 2020 йилнинг тўртинчи чорагидаги натижалар инвесторларнинг умидини оқламади, бундан ташқари, компания 2021 йил учун автомобилларни етказиб бериш бўйича аниқ мақсадни тақдим этмади, оқибатда Tesla акциялари 5 фоизга тушди.
