Россиянинг COVID-19’га қарши «Спутник V» вакцинаси Қирғизистонда расман рўйхатдан ўтказилди, деб хабар беради «РИА Новости» мамлакат Соғлиқни сақлаш вазирлигига таяниб.
«Қирғизистон Республикаси Соғлиқни сақлаш ва ижтимоий ривожланиш вазирлиги ҳузуридаги Дори воситалари ва тиббий буюмлар департаменти томонидан SARS-CoV-2 вируси чақирадиган коронавирус инфекцияси олдини олиш учун комбинацияланган векторли вакцина Гам-КОВИД-Вак (‘Спутник V’)га рўйхатдан ўтказиш гувоҳномаси берилди», — деди ССВ матбуот хизмати вакили.
Унинг сўзларига кўра, вакцинанинг рўйхатдан ўтказилиши «тез орада коронавирус инфекцияси олдини олиш учун аҳолини эмлаш» имконини беради.
Қирғизистонда коронавирусга чалиниш билан боғлиқ илк ҳолатлар 2020 йил март ойи бошида қайд этилган эди. Айни пайтда касалланиш ҳолатлари 86 мингдан ошган, 1460 киши вафот этган.
«Спутник V» Гамалея номидаги миллий эпидемиология ва микробиология тадқиқот маркази томонидан ишлаб чиқилган ва 2020 йил августида Россия ССВ томонидан рўйхатдан ўтказилган. Ушбу вакцина COVID-19 профилактикаси бўйича дунёда биринчисига айланди. «Спутник V» ўрганилган ва текширилган одам аденовирус векторлари платформасида яратилган. Аввалроқ вакцина клиник тадқиқотларининг учинчи босқичи натижалари эълон қилинган, унда «Спутник V»нинг юқори самарадорлиги ва хавфсизлиги тасдиқланган эди — вакцина самарадорлиги 91,6 фоизни ташкил қилди. Вакцина коронавирус инфекцияси билан касалланишнинг оғир ҳолатларидан тўлиқ ҳимоялайди. «Спутник V»дан фойдаланиш 30 дан ортиқ мамлакатларда маъқулланган.
Ўзбекистонда коронавирусга қарши «Спутник V» вакцинасини қўллашга 17 февраль куни рухсат берилган эди.
Қозоғистонда 1 февралдан Россияда ишлаб чиқарилган «Спутник V» вакцинаси ёрдамида коронавирусга қарши эмлаш бошланган. Шунингдек, Қозоғистон ўз ҳудудида ишлаб чиқарилган «Спутник V» вакцинасини ҳам рўйхатдан ўтказган.
Изоҳ (0)