Американинг Техас штати аҳолиси қорли бўрон вақтида Ford F-150 гибрид пикапи қандай қилиб асқатаётгани тўғрисидаги воқеалар билан бўлишди. Маҳаллий аҳоли ушбу пикапдан уйларини электр энергияси билан таъминлашда фойдаланмоқда, деб хабар беради Motor.
Техас штатига ёпирилган қор бўрони бир неча кундан буён электр энергияси таъминотидаги узилишларга сабаб бўлмоқда. Электрсиз қолган аҳоли уйларининг ичига чодир тиклаб, иссиқликни сақлаб қолишга уринмоқда. Бундан ташқари, маҳаллий супермаркетларда ўтин ва кўмир захираси тугай деб қолган. Ford F-150 гибрид пикапларининг эгалари ушбу ҳолатга вақтинча ечим топган — улар юк машинасидан электр манбаи сифатида фойдаланмоқда.
Америкаликлар пикапнинг борт генераторини уйларининг энергия тармоғига улаб қўйган. Айримлар эса машина ишлаб чиқараётган энергияни кабеллар ёрдамида уйдаги маиший техникаларни ишлатишга йўналтирган. Шу орқали аҳоли музлаткичлар, иситгичлар, ошхонадаги майда техникалар ва ҳатто телевизорларни ишлатмоқда. F-150 пикапи бор фуқаролардан бирининг сўзларига кўра, у 12 соатли узлуксиз ишлаш давомида 15 литрга яқин ёқилғи сарфлаган. Бошқа бир маҳаллий аҳоли гибрид юк машинасининг тежамкорлигини алоҳида таъкидлаган. Унинг қайд этишича, 72 соат давомида у бакдаги ёқилғининг чорак қисмини сарфлаган.
Шу билан бирга, кўплаб ёқилғи қуйиш шохобчалари қор сабаб ишини тўхтатган. Маҳаллий аҳоли ёқилғи тугагач, қандай қилиб вазиятдан омон чиқиши ҳозирча номаълум. Синоптикларнинг прогнозига кўра, Техасда қор бўрони яна бир неча кун давом этади.
Аввалроқ Жо Байден Техасни табиий офат ҳудуди деб эълон қилгани тўғрисида хабар берилганди.
Изоҳ (0)