Буюк Британия ҳукумати эски машиналаридан воз кечишга рози бўладиган британияликларга пул тўлаш бўйича таклифларни тайёрлади, деб ёзади Motor. Бу каби автомобиль эгалари 3 минг фунт стерлинггача пул олишлари мумкин — фақат маблағлар яна транспорт воситалари учун сарфланиши керак.
Британия шаҳарларидаги экологик вазиятни яхшилашга, шунингдек, аҳолининг шахсий автомобилларга бўлган қарамлигини камайтиришга қаратилган бу каби дастур баҳордан бошлаб Ковентрида ишга тушади. Унинг доирасида 2016 йилга қадар ишлаб чиқарилган дизель автомобиллар ва 2006 йилгача конвейрдан чиққан бензинда ҳаракатланувчи автомобиль эгаларига ўз транспорт воситаларидан воз кечиш таклиф этилади.
Бунинг эвазига ҳукумат эски машина эгаларига 3 минг фунт миқдорида субсидия тўлайди. Бу пулларни улар жамоат транспортидан фойдаланишга, каршеринг ёки такси хизматига, бундан ташқари, экологик автомобиллар — велосипед ва электроскутерлар харид қилишга сарфлашлари мумкин.
Буюк Британия Транспорт вазирлигининг маълумотларига кўра, 2019 йилда мамлакат аҳолиси ўзларининг шахсий автомобилларида 574 миллиард километр йўл босган, ушбу кўрсаткич беш йил олдинги натижалардан 11 фоизга кўп.
Эслатиб ўтамиз, 2020 йилнинг июнида Британияда электромобил фойдасига оддий машинасидан воз кечганларга 7,6 минг доллардан тўланиши тўғрисида хабар берилганди.
Изоҳ (0)