Toyota компанияси техаслик фельдшер Трей МакДэниэлга янги 4Runner йўлтанламасини совға қилади. Тиббиёт ходими музлаб қолган трассада юз берган йирик авария иштирокчисига айланган бўлиб, пачоқланган FJ Cruiser йўлтанламасининг ичидан чиқишга муваффақ бўлган ва жабрланувчиларга ёрдам беришга киришган, деб хабар беради Motor.
Ўтган ҳафта Трей МакДэниэл олдиндан тиббиёт формасини кийиб олиб, ўзининг Toyota FJ Cruiser’ида ишхонаси томон йўл олган. Аномал об-ҳаво оқибатида фельдшер ҳаракатланган шоссе музлаб қолган. Қаршисида кўплаб автомобиллар тўқнашганини кўрган эркак тормозни босишга тушган, бироқ йўлтанламас унга бўйсунмаган. Натижада бошқарувни йўқотган Трей йирик ЙТҲнинг марказида бўлиб қолган ва унинг машинасига магистрал шатакчиси келиб урилган.
Шикаст етган автомобиль ичидан чиқишга муваффақ бўлган Трей авария жойига етиб келган қутқарувчиларга ёрдам беришга киришган. Фельдшер оқ кийимда бўлгани сабаб фавқулодда хизмат ходимлари уни ўз ҳамкасби деб ўйлаган. Эркак қаршилик кўрсатмасдан, қутқарувчилар билан бирга жабрланувчиларга ёрдам беришга киришган. Кейинроқ у содир бўлган воқеани айтиб бергач эса МакДэниэлни зудлик билан шифохонага олиб келишган. Йирик ЙТҲ оқибатида 130 дан ортиқ автомобилга шикаст етган, ўнлаб инсонлар жароҳат олган, олти киши вафот этган.
Авария сабаб Трейнинг FJ Cruiser’и қайта тиклашга яроқсиз ҳолатга келиб қолган. Фельдшернинг мардонавор ҳаракатидан хабар топган Toyota вакиллари эркакка ўзи яхши кўрган моделни совға қилишга қарор қилган. МакДэниэл энг қиммат TRD Pro жамланмасидаги 4Runner йўлтанламасини танлаган. Бу каби модификацияга эга автомобиль нархи АҚШда 50,5 минг долларни ташкил этади.
Изоҳ (0)