Мадриднинг “Реал” клуби 33 ёшли дарвозабон Тибо Куртуа билан янги шартнома бўйича келишувга эришди. Бу ҳақда журналист Саша Таволери ўзининг Х (собиқ Twitter) саҳифасида хабар берди.
Манбага кўра, томонлар икки йиллик янги битим борасида оғзаки келишувга эришган. Ҳозирда Куртуанинг “қироллик клуби” билан амалдаги шартномаси 2026 йил ёзига қадар мўлжалланган. Агар янги келишув расман тасдиқланса, белгиялик посбон 2027/28 йилги мавсум якунигача “Реал Мадрид” сафида ҳаракат қилишда давом этади.
Аввалроқ оммавий ахборот воситаларида “Реал” Парижнинг “ПСЖ” клуби дарвозабони Жанлуижи Доннаруммага қизиқаётгани ҳақида хабарлар чиққан эди. Бироқ Куртуа билан келишувга эришилгач, мадридликлар италиялик дарвозабон трансферидан воз кечган.
Тибо Куртуа 2018 йил ёзида “Челси”дан 35 миллион евро эвазига “Реал” сафига қўшилган эди. У ўтган давр мобайнида клуб сафида 289 та ўйинда майдонга тушиб, 282 та гол ўтказиб юборган ва 114 та учрашувда дарвозаси даҳлсизлигини сақлаб қолган.
Transfermarkt портали маълумотига кўра, ҳозирда белгиялик дарвозабоннинг трансфер қиймати 20 миллион еврога тенг.
Изоҳ (0)