Рекордмейстернинг рекордлари: «Бавария» тарихидаги энг қиммат трансферлар

Мюнхеннинг «Бавария» клуби 2021 йилнинг 15 февраль куни «Лейпциг» ҳимоячиси Даё Упамекано трансферини расман эълон қилди. Франциялик футболчи 2020/21 йилги мавсум сўнгида «Бавария» сафига бориб қўшилади. Ушбу хабарлар фонида FootballHD нашри «Бавария» («рекордмейстер») тарихидаги энг қиммат трансферлар ҳақида материал тайёрлади. Қуйида ушбу мақола ўзбек тилида тақдим этилади.

Бенжамин Павар — 35 миллион евро

2018 йилнинг ёзида Павар Франция сафида Жаҳон Кубогида ғолиб бўлди. Бир йил ўтиб, «Бавария» Паварни «Штутгарт»дан 35 миллион еврога сотиб олди. Футболчи биринчи мавсумдаёқ янги жамоаси сафида барча мусобақаларда ғолиб бўлди, шу жумладан, клублар ўртасидаги Жаҳон чемпионатида ҳам. Францияликнинг трансфери қанчалик даражада ўзини оқлаганлигини айтишга ҳали эрта, боиси Бенжаминда ўнг қанот ҳимоячиси позициясида деярли рақобатчи йўқ. Аммо мюнхенликлар аллақачон бу борада иш олиб боришмоқда. Ёзда «рекордмейстер» Паварнинг бўшашмаслиги учун яна бир ҳимоячи билан шартнома имзолайди.

Ренату Санчеш — 35 миллион евро

2016 йилнинг ёзида «Бавария» умидли марказий ярим ҳимоячи сифатида Ренатуни сотиб олди. Мюнхенликлар бунинг учун «Бенфика»га 35 миллион евро тўлади. Аммо португалиялик Бундеслигада ўйнаб кета олмади. Бир йил ўтиб, «рекордмейстер» футболчини «Суонси»га (Англия) ижарага бериб юборди. Шундан сўнг ярим ҳимоячи Мюнхен клубида яна бир мавсум ўтказди, аммо натижа ўша-ўша эди. 2019 йилнинг август ойига келиб, «Бавария» Санчешни «Лилль»га 20 миллион еврога сотиб юборди. Францияда футболчи сезиларли даражада яхши ҳаракат қилишни бошлади. Аммо Германия чемпионлари учун бу трансферни бемалол муваффақиятсиз бўлди деб айтиш мумкин. Биринчидан, португалиялик жамоада ўз ўрнига эга бўлолмади. Иккинчидан, «Бавария» бунда 15 миллион зарарга кирди.

Матс Ҳуммелс — 35 миллион евро

Ҳуммелснинг фаолиятида фақатгина 2 та клуб бўлган — «Бавария» ва «Боруссия Дортмунд». Мюнхен клуби тарбияланувчиси ҳисобланган Матс 2009—2016 йилларда «Боруссия»да ўйнаган. 2016 йилда эса қадрдон клуби уни қайтариш учун Дортмунд клубига 35 миллион евро тўлайди. Германиялик футболчи «Бавария»да учта яхши мавсум ўтказади. Шу вақт ичида у уч мартадан Германия чемпионати ва мамлакат Суперкубогида ғолиб бўлди, шунингдек, бир бор Германия Кубогида ҳам зафар қучди. 2019 йилнинг ёзида эса мюнхенликлар уни яна «Боруссия»га 30 миллион еврога трансфер қилди. Умуман, Ҳуммелснинг трансферини «Бавария» учун фойдали бўлган дейиш мумкин. Шунинг учун ҳам томонлар дўстона кайфиятда хайрлашди.

Марио Гётце — 37 миллион евро

2013 йил ёзида «Бавария» «Боруссия Д» ярим ҳимоячиси Марио Гётцени ўз сафига қўшиб олиб, шов-шувли трансферни амалга оширди. Дортмундда Марионинг Мюнхенга кўчиб ўтгани яхши қабул қилинмади, чунки у «арилар» тарбияланувчиси эди ва жамоанинг асосий рақобатчиси сафига ўтиш сотқинликка тенглаштириларди. Гётце билан биргаликда футболчи кўплаб совринларни қўлга киритди. Ярим ҳимоячи Бундеслигада уч марта, Германия Суперкубогида икки марта ва яна бир мартадан УЕФА Суперкубоги ҳамда клублар ўртасидаги Жаҳон чемпионатида ғолиб чиққан. Шунга қарамай, Марио «мюнхенлик»ка айлана олмади. Уч йилдан сўнг Гётце «Боруссия»га қайтади. Дортмундда маълум вақт давомида яхши ўйин кўрсатган футболчи ҳозирда Нидерландиянинг ПСВ клубида фаолият юритмоқда.

Артуро Видаль — 39,3 миллион евро

Видаль «Бавария»га «Ювентус»дан 2015 йилнинг ёзида деярли 40 миллион евро эвазига ўтади. Уч йилдан сўнг Германия чемпионлари чилилик футболчини 18 миллионга «Барселона»га трансфер қилади. Миқдордаги фарқ сезиларли, аммо клуб учун футболчининг трансферини муваффақиятсиз деб аташ қийин. Артуро сингари футболчилар исталган жамоада қадрланади, чунки у ҳар бир учрашувга ўзини 100 фоиз бағишлайди. Видаль «Бавария»га ўз хоҳиши, кучи, жанговар руҳияти ва тажрибаси билан ёрдам бериб келган. Чилилик футболчи ҳозирда айнан шу хислатлари билан «Интер»нинг ёш футболчиларига ўрнак бўлмоқда.

Хави Мартинес

Мартинес ўзининг «Бавария»даги тўққизинчи ва сўнгги мавсумини ўтказмоқда. Хави 2012 йилнинг ёзидан бошлаб Мюнхен клуби шарафини ҳимоя қилади. Ўша пайтда немислар Мартинес учун «Атлетик»га 40 миллион евро тўлаганди. Бу ўша вақт ўлчовлари учун анчайин жиддий маблағдир, аммо Хави ўзига сарфланган пулларни охирги евросигача оқлади. Ярим ҳимоячи муваффақият жиҳатидан ҳар хил мавсумларни ўтказди, аммо у ҳар доим ўз ишини виждонан бажарар, баъзан эса ғалаба голларини ҳам урар эди. Мартинес «Бавария»нинг тарихий ютуқларида ўзининг беқиёс ҳиссасини қўшди. Шундай экан, немис клуби ёзда у билан муносиб хайрлашишга мажбур.

Корентин Толиссо (41,5 миллион евро)

2017 йилнинг ёзида «Бавария» «Лион» тарбияланувчиси учун 40 миллион евродан ортиқ маблағ сарфлади. Мюнхенда Толиссога катта умидлар боғланганди, аммо у ҳамон ротация футболчилигича қолмоқда. Французга жамоадошлари билан рақобатлашиш қийин бўлмоқда, айниқса, ҳозирги даҳшатли «Бавария»да. Ярим ҳимоячининг ўзи вазиятни ўзгартириш истагини билдирган вақтлар бўлган, клуб ҳам уни қўйиб юборишга тайёр эди. Шунга қарамай, Толиссо Мюнхенда қолди ва ушбу мавсумда ҳам ўйин амалиётига эга бўлмоқда. Бунинг сабаби ушбу мавсумда ҳар бир жамоа ротация эҳтиёж сезаётгани билан боғланмоқда. Шундай экан, ёзда французнинг кетиши мумкинлиги ҳақидаги гапларнинг пайдо бўлиш эҳтимоли йўқ эмас.

Даё Упамекано — 42,5 миллион евро

Упамекано «Бавария»нинг энг охирги трансфери ҳисобланади. «Рекордмейстер» бир неча кун олдин футболчининг трансферини эълон қилди. Унга «Ливерпуль» ва «Челси» ҳам даъвогарлик қилаётганди, аммо Даёнинг ўзи Мюнхенга ўтишга қарор қилди. Даёнинг «Бавария»да мавсум сўнггида жамоани тарк этадиган Давид Алабанинг ўрнини эгаллаши кутилмоқда. Ушбу трансфердан ҳар иккала томон ҳам фойда кўради. Мюнхеликлар Бундеслига ва Чемпионлар Лигасида тажрибага эга бўлган юқори даражали ҳимоячига эга бўлса, Упамекано эса клуб даражасида барча совринлар учун курашиши мумкин бўлади.

Лерой Сане — 45 миллион евро

«Бавария» жуда узоқ вақт давомида Санени Германияга қайтариш устида иш олиб борди. Мюнхенликлар футболчини «Манчестер Сити» билан шартномани узайтирмасликка ишонтирди. Натижада, футболчи 2020 йилнинг ёзида «Бавария»га ўтди. Мюнхен клуби сафидаги дастлабки мавсум Лерой учун омадли чиқмаяпти. Клубдагилар ҳам вингернинг ўз имкониятларидан паст даражада ҳаракат ҳаракат қилаётганлигини айтмоқда. Шунга қарамай немислар ватандошини қўллаб-қувватлашда ва унинг Англияда кўрсатган даражасига қайтишига ишонмоқда. Сане вақти-вақти билан кучли босимга ҳам дуч келмоқда, аммо у буни енгиб ўтиши керак бўлади. Чунки дунёнинг энг яхши клубларидан бирида ўйнашнинг бошқа усули йўқ.

Лукас Эрнандес — 80 миллион евро

«Бавария» тарихидаги энг қиммат футболчи чап қанот ҳимоячиси бўлади деб ким ҳам ўйлабди. 2019 йилнинг ёзида мюнхенликлар Эрнандес учун рекорд даражадаги 80 миллион евро тўлади. Лукас эса қийин вазиятга тушиб қолди. Бир томондан француз ўзининг трансфер нархи ва билдирилган катта умидлар туфайли жиддий босимга дуч келди. Бошқа томондан футболчига ниҳоятда кучли рақобатчи — Альфонсо Дэвис пайдо бўлди. Ҳозирда канадалик футболчи дунёнинг энг яхши чап қанот ҳимоячиларидан бири ҳисобланади. «Бавария» эса Дэвисни атиги 10 миллион еврога олган. 80 миллион еврога сотиб олинган Эрнандеснинг «Бавария»даги келгуси фаолияти қандай кечиш эса сўроқ остида қолмоқда.