Ўзбекистон Президенти 12 февраль куни Жиноят ва Жиноят-процессуал ҳамда Маъмурий жавобгарлик тўғрисидаги кодексларга ўзгартириш ва қўшимчалар киритиш тўғрисидаги қонунни имзолади. «Халқ сўзи» газетасида эълон қилинган ҳужжатда вояга етмаганларга нисбатан амалга оширилган қатор жиноятлар учун тўғридан-тўғри жиноий жавобгарлик белгиланган.
Қонун билан Жиноят кодексига киритилган қўшимчаларга кўра, 16 ёшдан 18 ёшгача бўлган шахснинг 18 ёшга тўлмаганлиги айбдорга аён бўлгани ҳолда уни мулкий манфаатдор этиш орқали у билан жинсий алоқа қилганлик учун жиноий жавобгарлик белгиланди.
Ушбу жиноятни содир этган шахсга 2 йилгача озодликдан маҳрум қилиш жазоси қўлланилиши мумкин.
Шунингдек, вояга етмаган шахсни ғайриқонуний жамоат бирлашмалари ва диний ташкилотлар, оқимлар, секталар фаолиятида қатнашишга ундаганлик учун жиноий жавобгарлик белгиланган. Ушбу жиноятни содир этган шахсга 3 йилдан 5 йилгача озодликдан маҳрум қилиш жазоси қўлланилиши мумкин.
Бундан ташқари, қонун билан Маъмурий жавобгарлик тўғрисидаги ва Жиноят кодексларига киритилган ўзгартиришларга кўра вояга етмаган шахсни меҳнатга бирор-бир шаклда маъмурий тарзда мажбурлаган шахс тўғридан-тўғри жиноий жавобгарликка тортилиши белгиланди (илгари маъмурий жазо қўлланилгандан сўнг такрор содир этилган тақдирда жиноий жавобгарлик белгиланган). Эндиликда бу каби жиноятлар учун БҲМнинг 150 бараваридан 200 бараваригача ёки 3 йилгача маълум ҳуқуқлардан маҳрум этиш ёки 3 йилгача ахлоқ тузатиш ишларига жалб этиш жазоси тайинланади.
Аввалроқ Ўзбекистонда оммавий тартибсизликка даъват қилганлик учун ҳам жиноий жавобгарлик белгиланиши кутилаётгани тўғрисида хабар берилганди.
Изоҳ (0)