Тошкент шаҳар Ички ишлар бош бошқармасида янги ташкил этилган шон-шараф музейида мўйлови билан Тошкент рамзларидан бирига айланган ДАН ходими сиймоси гавдалантирилди. Бу ҳақда 12 февраль куни музейнинг очилиш маросимида маълум қилинди, дея хабар бермоқда «Дарё» мухбири Мусулмонбек Иброҳимов.
Музейда «будённийча» мўйлов қўйган тошкентлик йўл ҳаракати нозири, старшина Содиқ Қосимов фаолияти ҳақида маълумот берувчи алоҳида жой ажратилган. У кўпинча хизмат қилган «Ёш гвардия» кинотеатри ёнидаги чорраҳа жонли тарзда гавдалантирилган.
Содиқ Қосимов 1912 йилда Тошкент шаҳрида ҳунарманд оиласида туғилган. 1931 йилда ички ишлар органига оддий милиционер лавозимига қабул қилинган. 1933 йилда Тошкент шаҳрида энди ташкил этилаётган йўл ҳаракати хавфсизлиги хизматига намунали ходимлар саралаб олина бошлаган ва раҳбарият тавсиясига кўра Содиқ Қосимов мазкур хизматга биринчилардан бўлиб қабул қилинган.
Хушмуомала, хушчақчақ бу инсоннинг фотосурати 1966 йилда «Огонёк» журналининг муқовасида босилган. Сураткаш Лев Шерстенников Содиқ Қосимовнинг кайфиятини, одамларга ва ўз касбига бўлган муносабатини сурат орқали акс эттира олган.
«Одамлар у ҳақда машиналар қулоқ соладиган бошқарувчи, деб гапиришарди: таёқчани силкитиши билан — машиналар ўнгга бурилар, яна бир силкитиш билан — улар тўхтаб, йўловчиларни ўтказиб юборарди», — дея унинг ҳаракатларига баҳо берилган.
Милицияда хизмат бошлаганидан бир йил ўтгач, тўрт нафар жиноятчини қўлга олишда қаҳрамонлик кўрсатгани учун 7-милиция бўлими милиционери Қосимовга миннатдорлик эълон қилинган ва рағбатлантириш сифатида велосипед топширилган.
Қайд этишича, кўпчилик старшина Қосимовни йўл ҳаракатини бошқариш бўлими ходими сифатида эслайди — пойтахтликлар уни истеъдодли, ўз ишининг моҳир устаси деб билишар, у ҳақдаги турли ҳикоялар эса оғиздан оғизга ўтиб келади. Ҳаракатларининг равонлиги, гўзаллиги ва нафосати учун одамлар уни «артист» деб аташган ва ёшу қари унинг йўл ҳаракатини бошқаришини кузатиш учун келган.
Катта ёшли авлоднинг эслашича, Қосимов ўз ишига сидқидилдан ёндашган. Унга ҳайдовчилар ҳам, пиёдалар ва ҳамкасблари ҳам ҳурмат билан қараган. Қосимов хизмат бошлаганининг 25 йиллиги муносабати билан тантанали тадбир ўтказилган.
Старшина Қосимов узоқ йиллик ҳалол хизмати давомида бир неча бор давлат мукофотларига сазовор бўлган. У ҳеч қачон ҳайфсан олмаган ва раҳбарият томонидан 83 марта рағбатлантирилган. У орден ва медаллар (жумладан, «Қизил байроқ» ва «Қизил юлдуз»), «Беш йиллик зарбдори» унвонини олган.
Изоҳ (0)