«Қамоқхоналардаги тиббиёт ходими ИИВ тизимига бўйсунади?». Расул Кушербаев қамоқхоналарда нега қийноқлар аниқланмаётганига изоҳ берди

11 февраль куни Олий Мажлис Қонунчилик палатасидаги O‘zLiDeP фракциясининг навбатдаги йиғилиши бўлиб ўтди. Унда депутатлар Олий Мажлиснинг Инсон ҳуқуқлари бўйича вакили (Омбудсман)нинг 2020 йилдаги фаолияти тўғрисидаги ҳисоботи билан танишди.

Йиғилишда депутат Расул Кушербаев Омбудсманнинг 2019 йилги ҳисоботида 139 маҳбусдан қийноқлар юзасидан шикоят келиб тушгани, аммо ўрганишлар натижасида қийноқ билан боғлиқ бирорта ҳолат аниқланмагани ва мазкур ҳолат очиқ олганига эътибор қаратган.

«Қамоқхоналардаги қийноқлар факти ўша муассасадаги тиббиёт ходимлари хулосаси билан тасдиқланади. Муассаса тиббиёт ходими эса ўз-ўзидан ИИВ тизимига бўйсунади. Бу – жазони ижро этиш муассасаларида нега қийноқлар аниқланмаётганига жавоб. Ўтган йилги ҳисоботда Омбудсман бу масалада ИИВнинг бу борадаги йўриқномасини бекор қилиш ва у ердаги тиббиёт хизматини тўғридан-тўғри Соғлиқни сақлаш вазирлиги бўйсунувига бериш таклифини илгари сурган эди. Шу масала очиқ қолиб кетди. Ҳозир бизга қамоқхоналардаги тиббий хизмат бўйсунувини ИИВдан олиб, ССВга беришга нима халақит беряпти?», — дейди Олий Мажлис Қонунчилик палатаси депутати.

https://www.facebook.com/UzLiDeP/videos/4319836068028202

Олий Мажлис Инсон ҳуқуқлари бўйича вакили Феруза Эшматова ўтган йилги ҳисобот эшитувида иштирок этмаганини таъкидлаб, унда қатнашган масъул ходимлардан бу борада қандай ишлар амалга оширилгани бўйича маълумот беришларини сўраган. Агар ўрганишлар амалга оширилмаган бўлса, бу йил ушбу масала ўрганиб чиқилишини билдирган.

«Бу асосан иккала вазирликнинг келишувига боғлиқ. Бизнинг ташкилот ҳозир ҳам шу фикрда. Шунинг учун бу таклиф депутатлар томонидан қўллаб-қувватланса, муаммо ечилади. Яқинда 13-колонияга ҳам бориб келдик. Ойлик масаласи жуда ҳам паст. Шу масала бўйича ҳам бизга ўз дардларини айтиб ўтишди. Бу масалаларни биргаликда ўрганиб, ечимини топса бўлади», — дейди Омбудсман котибият мудири Саидбек Азимов