Andijon viloyati hokimi Shuhrat Abdurahmonovga yangi o‘rinbosarlar tayinlandi, deya xabar berdi “Daryo” muxbiri.
Ma’lum bo‘lishicha, viloyat davlat soliq boshqarmasi boshlig‘i Otabek Tursunov Shuhrat Abdurahmonovning birinchi o‘rinbosari etib tayinlangan.
Shuhrat Abdurahmonov yangi o‘rinbosarlari haqida xalq deputatlari Qo‘rg‘ontepa tumani kengashining navbatdan tashqari sessiyasida ma’lum qilgan va Otabek Tursunovni moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i sifatida tanishtirgan.
Otabek Tursunov 1984-yil Andijon shahrida tug‘ilgan bo‘lib, 2007-yil Andijon muhandislik-iqtisodiyot institutini tamomlagan. Ish faoliyatini Andijon shahridagi “Sanoat qurilish temp” mas’uliyati cheklangan jamiyati ta’minotchiligidan boshlagan. 2007—2019-yillarda viloyat davlat soliq boshqarmasi fuqarolarni ro‘yxatga olish bo‘yicha navbatchisi, banklar ma’lumotlari asosida soliq to‘lovchilarning budjet bilan munosabatlarini tahlil qilish sho‘basi davlat soliq inspektori, boshqarma nazorat organlari faoliyatini muvofiqlashtirish va monitoring olib borish, yuridik shaxslarga soliq solish bo‘limlari boshlig‘i, boshqarmasi boshlig‘i o‘rinbosari, birinchi o‘rinbosari vazifalarida ishlagan. 2020-yil 16-iyuldan buyon Andijon viloyati davlat soliq boshqarmasi boshlig‘i sifatida ishlab kelayotgan edi.
Muhammadjon Nishonov esa viloyat mahalla va oilani qo‘llab-quvvatlash boshqarmasi boshlig‘i, hokim o‘rinbosari sifatida ish boshlagan.
U 1969-yilda Andijon shahrida tug‘ilgan bo‘lib, 1992-yilda Toshkent irrigatsiya va qishloq xo‘jaligini mexanizatsiyalashtirish muhandislari institutini, 2004-yil Ichki ishlar vazirligi аkademiyasi tugatgan. O‘tgan yillar davomida viloyat ichki ishlar boshqarmasi tizimida turli lavozimlarda ishlagan. 2016—2017-yillarda Andijon viloyati hokimining ma’muriy masalalar, huquqni muhofaza qilish organlari faoliyatini muvofiqlashtirish, o‘zini o‘zi boshqarish organlari va yoshlar siyosati bo‘yicha birinchi o‘rinbosari vazifasida ishlagan.
2018—2020-yillarda Marhamat tumani ichki ishlar bo‘limi boshlig‘i, viloyat IIB post patrul xizmati va jamoat tartibini saqlash boshqarmasi boshlig‘i sifatida mehnat qilgan. 2020-yildan tayinlovga qadar viloyat IIB boshlig‘ining o‘rinbosari-huquqbuzarliklar profilaktikasi bosh boshqarmasi boshlig‘i sifatida ishlagan.
Eslatib o‘tamiz, avvalroq Andijon viloyati hokimining o‘rinbosari, Mahalla va oilani qo‘llab-quvvatlash boshqarmasi boshlig‘i Manzura Yunusova o‘z arizasiga muvofiq egallab turgan lavozimidan ozod etilgani haqida xabar berilgandi. Uning o‘rniga 2020-yilning sentabr oyida Shokirjon Boltaboyev tayinlangandi.
Izoh (0)