Америкалик адвокат Zoom’да фильтрни ўчиришни эсдан чиқарди ва суд мажлисида кўзлари ўйнаб турадиган мушук образида чиқиш қилди (видео)

Техаслик адвокат Род Понтон тасодифан Zoom’да мол-мулкни мусодара қилиш бўйича ўтказилаётган видеоконференцияга мушук ниқобида қўшилиб қолди. Ролик суднинг YouTube’даги каналида эълон қилинган.

Судья Рой Фергюссон Понтонга фильтр ёқилиб қолганини айтиб, уни ўчириб қўйишини сўраган. «Мен онлайнман ва мушук эмасман», — дейди Понтон. Судья уни кўриб турганини айтиб, фильтрни қандай ўчиришни тушунтирган. «Мушук мени тушунди. У ҳам худди мен каби содир бўлган воқеадан хафа бўлди», — дейди адвокат.

«Ҳар доим энг зўр адвокат сифатида машҳур бўлишни хоҳлардим. Энди эса суд мажлисида мушук кўринишида пайдо бўлган инсон сифатида танилдим», — дея тан олади Понтон.

https://twitter.com/JudgeFergusonTX/status/1359202090824966151

Судья Фергюссоннинг сўзларига кўра, Понтоннинг компьютеридаги фильтрни унинг ўғли ёқиб қўйган, адвокат эса уни ўчиришни унутган. Шунингдек, унинг таъкидлашича, бу каби қизиқарли онлар — «оғир дамларда ҳам адолат тизимининг ишлашини давом эттиришга уринган юристларнинг ‘ёрдамчи маҳсулоти’ ҳисобланади».