Сербия полицияси мамлакат президенти Александр Вучичга суиқасд тайёрлангани ҳақида тезкор хабар берди. Бу 27 январь — Ўрта аср Сербия давлати асосчиси Стефан Неман ёдгорлиги очилган куни Белградда содир бўлиши режалаштирилган. Бу ҳақда криминал полиция бўлими бошлиғи Богдан Пушичнинг Пинк каналида берган маълумотларига таяниб «ТАСС» хабар берди.
Пушичнинг сўзларига кўра, Белграддаги ёдгорликнинг очилиш маросимида режалаштирилган суиқасддан давлат раҳбарини ҳимоя қилиш учун 850 дан ортиқ махсус хизмат ходими қатнашди.
Сербия ҳуқуқни муҳофаза қилиш органи ходимлари 4 февраль куни Белградда махсус операция давомида уюшган жиноий гуруҳнинг 17 аъзосини ҳибсга олди. Уюшган жиноий гуруҳ футбол мухлислари кўринишида ниқобланган, шунинг учун тезкор тадбир «Партизан» ва «Райко Митич» стадионлари («Црвена Звезда» клубининг аренаси)да бўлиб ўтди. Мамлакат Ички ишлар вазирлигининг маълумотларига кўра, қўлга олинган гумонланувчиларнинг уйидан икки дона снайпер винтовкаси топилган. Гумонланувчилар қотиллик, одам ўғирлаш, товламачилик ва гиёҳванд моддалар билан шуғулланишда айбланяпти. Лекин уларнинг президент Вучичга суиқасд уюштиришга уринганини исботловчи аниқ далиллар ҳали топилмаган. Айни вақтда суриштирув ишлари олиб борилмоқда.
Александр Вучич 2020 йилнинг 20 октябрида мафияга қарши расмий равишда уруш эълон қилган. Ўшанда мамлакат президенти жиноят олами ҳукумат устидан ҳеч қачон ғалаба қозона олмаслигини таъкидлаган.
Ўтган ойлар мобайнида Белградда бир нечта буюртмали қотилликлар амалга оширилди. 2020 йил 13 сентябрда жиноий авторитет Страхиня Стоянович шундай қотиллик қурбонига айланди, унинг машинаси шаҳар марказида ҳаракатланаётганда портлатиб юборилди. Кейинроқ «Ушче» савдо марказининг ерости автотураргоҳида ҳам қотиллик содир этилган. Бундан ташқари, Янги Белградда мафияга алоқадорлиги тахмин қилинган шахс уйининг ерости тураргоҳида отиб кетилган.
Изоҳ (0)