Вилоят ҳокимлигида Панжоб вилояти губернатори Муҳаммад Сарвар бошчилигидаги Покистон делегациясининг расмий қабули бўлиб ўтди. Бу ҳақда «Дарё» мухбири Азизбек Абдувалиев хабар берди.
Вилоят ҳокими Шавкатжон Абдураззақов Панжоб вилояти губернатори Муҳаммад Сарварни Наманганга келгани билан самимий қутлади ва ушбу ташриф Наманган делегациясининг 2019 йилда Покистонга сафарига амалий жавоб бўлганини таъкидлади.
«Покистоннинг энг йирик вилояти бўлган Панжоб ва Наманган ўртасидаги алоқаларни мустаҳкамлаш биз учун муҳим аҳамиятга эга. Шуни алоҳида таъкидлаб ўтмоқчиманки, Наманган ва Панжоб вилоятлари ўртасидаги ҳамкорлик стратегияси ва муайян йўналишларини ишлаб чиқиш бўйича махсус ишчи гуруҳи ташкил этилди. Бу гуруҳга шахсан ўзим раҳбарлик қиламан», — деди Шавкатжон Абдураззақов.
Учрашув якунида Наманган вилояти ҳокимлиги ва Панжоб вилояти ҳукумати ўртасидаги савдо-иқтисодий, инвестиция, маданий-гуманитар, илмий-техникавий ва туризм соҳаларидаги ўзаро ҳамкорлик тўғрисида меморандум имзоланди.
Минтақалараро ҳамкорликнинг амалий аҳамияти ва салоҳиятини инобатга олиб, Наманган ва Панжоб вилоятлари «Биродарлашган ҳудудлар» дея эълон қилинди.
Изоҳ (0)