4 февраль куни Бухоро шаҳри, Ислом Каримов кўчасида жойлашган 9 қаватли уйнинг 3-қаватидаги хонадонда газ сизиб чиқиши натижасида портлаш юз бергани ва оқибатда 12 киши жароҳат олгани тўғрисида хабар берилганди. Қурилиш вазирлиги бу борада олиб борилган ўрганиш ишларига оид маълумотлар билан бўлишди.
Маълум қилинишича, White group trading МЧЖ (раҳбари Жамшид Кароматов) томонидан мазкур кўп қаватли бинонинг қурилиш ишлари ўзбошимчалик билан бошланган бўлиб, бу ҳақида Қурилиш бош бошқармаси ва ҳудудий инспекция томонидан (2019 йил 16 январдаги №48 ва 49-сонли хатлар билан Бухоро шаҳар ҳокимлиги ва прокуратурасига) маҳаллий ҳокимият ҳамда ҳуқуқни муҳофаза қилувчи органлари қонуний чора кўриш учун хабардор қилинган.
Бухоро шаҳар ҳокимининг 2019 йил 7 июлдаги 2894-сонли қарори билан Бухоро шаҳрининг Ислом Каримов кўчаси 7-уй манзилида жойлашган 12 та хонадон ва 9-уйда жойлашган 12 та хонадон, шу билан бирга, ҳудуддаги савдо дўконлари эгалари билан тузилган келишув битимлари инобатга олиниб, 1220 квадрат метрда жойлашган ер участкасида White group trading МЧЖга 1 ва 2-қаватлари савдо ҳамда маиший хизмат кўрсатиш ва юқори қаватларида кўп хонадонли турар жой биноси қурилишига рухсат берилган. Мазкур қарорга асосан вилоят Қурилиш бош бошқармаси томонидан 2020 йил 26 июлда 1578-сонли архитектура-режалаштириш топшириғи тайёрланиб, лойиҳа ташкилоти «Аркада Архстрой Сервис» ХК томонидан 1-қавати савдо ва маиший хизмат кўрсатиш 7-8 қаватли турар жой биносига лойиҳа ечимлари ишлаб чиқилган.
Таъкидланишича, лойиҳа вилоят шаҳарсозлик кенгашида тасдиқланмаган ва ижобий экспертиза хулосаси олинмаган. Шунингдек, Бухоро вилояти Қурилиш соҳасида ҳудудий назорат инспекциясидан қурилиш-монтаж ишларини бошлаш учун рўйхатдан ўтмасдан қурилиш-монтаж ишлари олиб борилган. Шаҳарсозлик ҳужжатларини тўлиқ расмийлаштирмасдан, қурилиш ишларини олиб бораётганлиги учун инспекция ходимлари томонидан White group trading МЧЖ раҳбарига огоҳлантириш берилган. Вилоят ва шаҳар ҳокимликлари ҳамда прокуратура органларига бир неча бор ноқонуний қурилиш олиб бораётган White group trading МЧЖга нисбатан чора кўриш учун (2020 йил 13 июлда 1029-, 1030- ва 1031-сонли) хатлар чиқарилган.
Бундан ташқари, тасдиқланган концепция лойиҳасини бузиб, ўзбошимчалик билан қаватлар сонини оширгани сабабли ноқонуний қурилаётган қурилмани бартараф қилиш учун Бухоро туманлараро иқтисодий судига даъво аризалари киритилган. Бунда даъвогар сифатида инспекциянинг бош мутахассиси ва Бухоро шаҳар қурилиш бўлими мутахассислари иштирок этган. Суд томонидан эса 2020 йил 23 октябрда 4-2001-2003/928-сонли ишнинг ноқонуний қурилмани бартараф қилиш тўғрисида ҳал қилув қарори қабул қилинган.
«Юқоридагилардан келиб чиқиб айтиш мумкинки, ҳудудларда рухсатнома ва шаҳарсозлик ҳужжатларисиз қурилаётган объектларда буюртмачининг техник, лойиҳачининг муаллифлик ва пудратчининг ички назорат тизими тўғри йўлга қўйилмаганини кўрсатмоқда.», — дейилади вазирлик хабарида.
Эслатиб ўтамиз, аввалроқ Бухородаги кўп қаватли уй портлаши оқибатида 12 киши жароҳатлангани, ҳолат юзасидан жиноий иш қўзғатилгани ҳақида хабар қилинганди.
Изоҳ (0)