Ўзбекистон Президентининг қизи Саида Мирзиёева ўзининг Telegram’даги канали орқали аҳолининг фикрини эътиборга олмасдан, боғ ҳудудларини тубдан ўзгартириш мумкин эмаслигини маълум қилди.
«Шаҳар жамоат жойлари, айниқса, яшил боғ ҳудудлари муҳофаза қилиниши, асралиши ва кенгайтирилиши лозим. Жамоат ва шаҳар аҳолисининг фикрини эътиборга олмасдан уларни тубдан ўзгартириш мумкин эмас», — деб ёзади у.
Пост остига Ўзбекистон мустақиллигининг 30 йиллиги муносабати билан «Истиқлол» комплексини қуриш режалаштираётган Тошкент марказидаги «Мовий гумбазлар» скверининг сурати жойлаштирилган.
Саида Мирзиёева Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси ўринбосари ҳамда Ўзбекистон гендер тенглигини таъминлаш комиссияси аъзоси ҳисобланади.
«Истиқлол» мажмуасини қуриш ва унда «мустақилликнинг моҳияти ва улкан тарихий аҳамиятини акс эттирувчи монументал композиция»ни яратиш Президентнинг 2020 йил 17 декабрдаги фармонида кўзда тутилган эди. Фармонда комлекс қуриладиган жой аниқ кўрсатиб ўтилмаган.
11 январь куни Шавкат Мирзиёевга мамлакат банклари томонидан 2021 йилда амалга оширишни режалаштираётган йирик инвестицион лойиҳалар тақдим этилганди. «Gazeta.uz»нинг ёзишича, эскизлардан бирида «ЦУМ» қаршисидаги сквердаги комплекс лойиҳаси тасвирланган.
4 февраль куни Тошкент шаҳар ҳокимлиги Ўзбекистон мустақиллигининг 30 йиллигига бағишланган «Истиқлол» мажмуаси концепцияси лойиҳасини яратиш учун танлов эълон қилди.
Таклиф жамоатчиликнинг кенг эътирозларига сабаб бўлмоқда. Янгиликлар остидаги изоҳларда фойдаланувчилар пойтахтдаги кам сонли яшил ҳудудлардан бирига тегинмасликни, бу ерга шаҳарнинг турли бурчаклардан одамлар дам олиш учун келишини таъкидламоқда. Сквер яқинда (2018 йилнинг баҳорида) ободонлаштирилган.
«Байрамни нишонлашни истайсизми? Тошкент ва Ўзбекистоннинг бошқа шаҳарларида 30 та боғ қуринг. Аттракционларсиз, пафосли ҳайкаллар, фаст-фуд ва ортиқча ‘харажатъларсиз, шунчаки соя-салқин боғлар — 30 та — бу рамзий ва халқ учун. Уларнинг барчаси ‘Истиқлол’ деб номланса ҳам майли, гап бунда эмас — улар яшил, салқин ва тинч бўлсин!», — деб ёзади фойдаланувчилардан бири.
Тошкент ҳокими Жаҳонгир Ортиқхўжаев 2019 йилнинг майида берган интервьюсида пойтахтнинг бошқа жамоат жойлари қатори боғларни ободонлаштириш туфайли «одамларни кўчага қайтариш»га муваффақ бўлганини айтганди. «Одамлар шунча йил уйда ўтирди. Ҳукумат тўртта одам тўпланишидан қўрқиб қолганди. Мен одамлардан қўрқиш керак эмаслигини исботлашни хоҳладим. Улар турли одамларни кўриши, туристлар билан мулоқот қилиши, уйдан чиқиши керак», — деган эди пойтахт ҳокими.
Изоҳ (0)