«Тошкент метрополитени» янги метро станциялари нима сабабдан номланмаётгани борасидаги танқидларга жавоб қайтарди

«Тошкент метрополитени» янги метро станцияларига номлар қўйилмагани тўғрисидаги танқидларга жавоб берди.

Маълум қилинишича, янги қурилган станцияларга ном бериш жараёнида «Тошкент метрополитени» УК умуман иштирок этмаяпти.

«Ушбу масала Географик объектларни номлаш ва қайта номлаш масалалари бўйича Тошкент шаҳар комиссияси ваколатига киради. Бундан ташқари, лойиҳада кўзда тутилган истиқболли қурилиш тўлиқ амалга оширилмаган. Режалаштирилган метро станциялардан бугунги кунга қадар еттита қурилган станция фойдаланишга топширилди», — дейилади хабарда.

Шунингдек, «Тошкент метрополитени» УК мутахассислари томонидан метрода адашмаслик ҳамда йўловчиларга янада қулайлик яратиш мақсадида метродаги йўналиш чизмалари, турли кўрсатгичлар ва бошқа навигация кўринишлари босқичма-босқич янгилаш ишлари олиб борилаётганини маълум қилган.

Эслатиб ўтамиз, Сергели метро линиясини қуриш ишлари 2016 йилнинг декабрида бошланган бўлиб, у 2020 йилнинг кузида фойдаланишга топширилиши лозим бўлган. Лойиҳага кўра, метрополитеннинг янги йўналиши «Чоштепа», «Тошкент ҳалқа йўли», «Сергели», «Афросиёб», «Қипчоқ» ва «Чинор» номларига эга бўлиши керак эди.

Сентябрь ойида Тошкент метрополитени ходими Рустам Пўлатов янги метро линияларининг рақамланиши вақтинча эканлигини билдириб,  «Қолган бекатлар ҳам қуриб битказилгандан кейин Тошкент шаҳар ҳокимлигининг тегишли идоралари бекатларга ном қўяди. Атамашунослар бунда бекатлар қурилган жойнинг тарихи, ўтмишини ўрганиб, шунга кўра ном танлайди», деб айтганди.

Бироқ 30 август куни очилган Қўйлиқ метроси бекатларининг ҳам, Сергелидаги метро станцияларининг ҳам номи йўқ, фақат рақамланган.