28 январь куни Samarqand Darvoza савдо-кўнгилочар маркази (SD MALL) ходимлари Makro супермаркетлари тармоғининг савдо зали ва ширинликлар бўлимидаги электр энергияси таъминотини узиб қўйди. Бу ҳақда савдо тармоғи вакилларига таяниб, Spot хабар берди.
Makro юристи Сергей Арутюняннинг сўзларига кўра, ижара шартномасида электр энергиясини ўчириш кўзда тутилмаган, шу сабабли ушбу ҳолат тўғридан-тўғри унинг бузилиши ҳисобланади. Шунингдек, унинг маълум қилишича, Carrefour эълони Samarqand Darvoza ва Makro ўртасидаги келишув ҳали якунланмаган бир вақтда чиққан (ижара муддати 19 январь куни тугаган).
Эслатиб ўтамиз, 7 январь куни Majid Al Futtaim Франциянинг Carrefour савдо тармоғи Compass ва Samarqand Darvoza’даги Makro супермаркетлари ўрнида очилишини маълум қилганди. Makro супермаркетлар тармоғи бошқарувчиси Роман Сайфулин эса буни «кутилмаганда содир бўлди» дея таърифлаганди.
Makro ҳозирда ўзларининг ҳуқуқлари қўпол бузиляпти деб ҳисобламоқда — савдо-кўнгилочар марказ (СКМ) бошқа талабгорлар билан бирга тенг шартларда ижара шартларини таклиф қилиши шарт.
Арутюняннинг сўзларига кўра, Carrefour’нинг баёноти тузилган шартномаларнинг мавжудлигини англатади, яъни бу орқали Makro’нинг устун ҳуқуқи бузилган.
Carrefour эса ушбу ҳолатга Compass ва Samarqand Darvoza савдо марказларидаги гипермаркетларни ишга тушириш бўйича Ўзбекистон—Уммон инвестиция компанияси билан ҳамкорлик тўғрисидаги битим имзоланган фактини қайд этган, холос.
Makro вакилининг маълум қилишича, 6 январь куни уларга СКМ маъмуриятидан хат келган бўлиб, унда ижарага олинган ҳудуднинг қабул қилиш—топшириш (қайтариш) актини имзолаш таклиф этилган, яъни улар кейинги муносабатларини тугатишни талаб қилган.
Компаниядагилар буни асосланмаган, шунингдек, мавжуд қонунчиликнинг бир нечта асослари бўйича қонун бузилиши деб ҳисобламоқда:
- ижара шартномаси амалда бўлган вақтда SD MALL томонидан Makro’га ижара борасида бирор эътироз келиб тушмаган;
- Makro бир неча бор SD MALL’га шартнома муддатини ижара ҳаққини ошириш бориш орқали 10 йил муддатга узайтиришни таклиф қилиб келган.
«Бизнинг томон даъво тартибига амал қилди — низони судгача бўлган тартибда ҳал қилиб бўлмади, шунинг учун биз судга даъво аризаси билан мурожаат қилдик. Мақсад — тенг ҳуқуқлар ва имтиёзли ҳуқуқ шартлари бўйича шартномани қайта кўриб чиқиш», — дейди Сергей Арутюнян.
Маълумот учун, аввалига Compas, Samarqand Darvoza ва Makro The Tower Мall Management Group’га тегишли бўлган, бироқ 2019 йилда компания иккала СКМни ҳам ўзбек—уммон инвестиция компаниясига сотиб юборган.
Эслатиб ўтамиз, Majid Al Futtaim компанияси бошқарувида бўлган Carrefour 2020 йилнинг охирларида Тошкентда биринчи супермаркетни очганди.
Изоҳ (0)