Тошкент туманлараро маъмурий суди йирик қурилиш компанияси бузиб ташлашга уринган Бобур кўчасидаги 7-уйга боғлиқ мунозарали иш бўйича якуний қарорни чиқарди. Бу ҳақда Олий суд матбуот хизмати хабар берди.
1 февраль куни Тошкент туманлараро маъмурий судида аризачи Н.Юнусова ва О.Пиантковскаянинг жавобгар Тошкент шаҳар ҳокимиятига нисбатан ҳоким қарорини ҳақиқий эмас деб топиш ҳақидаги маъмурий иш мазмунан кўриб чиқилиб, ҳал қилув қарори ўқиб эшиттирилган.
Ҳал қилув қарорига кўра, аризачи Н.Юнусова ва О.Пиантковскаянинг аризаси қаноатлантирилиб, Тошкент шаҳар ҳокимининг 2007 йил 2 августдаги 697-сонли қарорининг Тошкент шаҳар Яккасарой тумани Бобур кўчаси 7-уйни маданий мерос объектлари давлат рўйхатидан чиқаришга оид қисмини ҳақиқий эмас деб топди.
Шунингдек, ишни кўриш давомида аниқланган қонунбузарликлар юзасидан жавобгар Тошкент шаҳар ҳокимияти ва Маданият вазирлигининг Маданий мерос объектларини муҳофаза қилиш ва улардан фойдаланиш илмий-ишлаб чиқариш бош бошқармаси Тошкент шаҳар, Тошкент ва Сирдарё вилоятлари бўйича минтақалараро давлат инспекциясига нисбатан хусусий ажрим чиқарилган.
Суд қарорларига нисбатан 1 ойлик муддат ичида Тошкент шаҳар маъмурий судига шу суд орқали шикоят берилиши ёки протест келтирилиши мумкин.
Эслатиб ўтамиз, 2007 йилга қадар маданий ёдгорликлар рўйхатида бўлган 7-уй Тошкент шаҳрининг собиқ ҳокими Абдуқаҳҳор Тўхтаев буйруғи билан ундан чиқариб ташланган. Орадан 11 йил ўтгач қурувчилар аҳолини уйдан кўчиришни бошлаган. Бироқ уйда истиқомат қиладиган фуқароларнинг бир қисми уйни яна маданий мерос объектига айлантиришга муваффақ бўлган. 2020 йил апрелда маданият вазири томонидан тасдиқланган хулосада «Тошкент шаҳри Бобур кўчасидаги 7-уй меъморий ёдгорлик сифатида сақлаб қолинади» дейилган.
Изоҳ (0)