Ўзбекистонда 2021—2022 йилларда маҳалла қўмиталари учун 1,7 триллион сўмга 2951 та бино қурилиши режалаштирилмоқда. Бу ҳақда Вазирлар Маҳкамасининг 1 февралдаги «Фуқароларнинг ўзини ўзи бошқариш органлари мажмуаларини ташкил этиш бўйича 2021—2022 йилларга мўлжалланган манзилли дастурини тасдиқлаш тўғрисида»ги қарорида қайд этилган.
Дастурнинг 2021 йилда амалга ошириладиган биринчи босқичи доирасида 1881 та бино қурилиши кутилмоқда. Бунинг учун 1,068 триллион сўм йўналтирилади. Ушбу маблағдан 866,5 миллиард сўм давлат-хусусий шерикчилик асосида, қолган 203,4 миллиард сўм эса маҳаллий бюджетнинг қўшимча манбалари ҳисобидан молиялаштирилади.
Иккинчи босқичда — 2022 йилда мамлакат бўйлаб яна 1070 та фуқароларнинг ўзини ўзи бошқариш органлари биноси пайдо бўлади. Бунинг учун яна 633,3 миллиард сўм ажратилади. Харажатларнинг 485,2 миллиард сўми давлат-хусусий шерикчилик асосида, 148,1 миллиард сўми маҳаллий бюджетнинг қўшимча манбалари ҳисобидан йўналтирилади.
Ҳужжатда қайд этилишича, қурилаётган биноларга зарур ташқи муҳандислик-транспорт коммуникацияларини ўтказиш, электр, газ таъминоти ва алоқа қисми бўйича «Ҳудудий электр тармоқлари», «Ўзтрансгаз» ва «Ўзбектелеком» маблағлари жалб этилади.
Биноларни мебель, техника, бошқа ускуна ва жиҳозлар билан таъминлаш харажатлари «Маҳалла» хайрия жамоат фонди маблағлари, грантлар, кредитлар, ҳокимликларнинг қўшимча маблағлари ҳисобидан қопланади.
Маҳалла қўмитасининг ҳар бир биносида вазирликнинг ҳамда «Маҳалла» хайрия жамоат фондининг ҳудудий бўлинмалари жойлаштирилади.
Аввалроқ «Маҳалла раиси — ислоҳотчи» тамойили асосида ижтимоий муаммоларни ҳал қилиш бўйича янги тизим жорий этилиши маълум қилинганди. Шунингдек, туманлардаги иқтисодий комплекс ходимлари ҳар бир маҳаллага бириктирилиб, ўз соҳасига доир масалаларни ҳал қилиб бориши режалаштирилган.
Изоҳ (0)