COVID-19 пандемияси бошлангандан буён Хитой хакерлик ва бошқа усуллардан фойдаланган ҳолда АҚШ фуқароларининг ДНКларини ўз ичига олувчи тиббий маълумотларни олиш учун салмоқли ҳаракатлар қилди, дейилади Американинг Миллий контрразведка ва хавфсизлик маркази (NCSC) баёнотида. Бу ҳақда «Интерфакс» хабар берди.
Баёнотда айтилишича, Хитой узоқ йиллар давомида АҚШ ва бошқа мамлакатлардан катта ҳажмдаги тиббий маълумотларни нафақат қонуний, балки ноқонуний йўллар билан ҳам олиб келган.
Шунингдек, «Хитой америкаликларга тегишли тиббий маълумотларни йиғиши нафақат инсонлар ҳаётига, балки мамлакат иқтисодиёти ва хавфсизлигига жиддий таъсир кўрсатиши» айтилган.
Таъкидланишича, коронавирус пандемияси даврида Хитойнинг BGI биотехнология компанияси кўплаб давлатларга COVID-19 тест тўпламларини таклиф қилган ва охирги олти ой мобайнида 18 та тажриба лабораториясини ташкил қилган, эҳтимол, бу тиббий маълумотларни қўлга киритиш учун қилинган ҳаракатлар бўлган.
«Хитой турли мамлакатлар аҳолисининг катта ҳажмдаги геном маълумотларини тўплаш ва таҳлил қилиш орқали янги тиббий кашфиётлар ва препаратлар яратиш, бунинг натижасида сунъий интеллект ва аниқ тиббиёт соҳасига сарфланувчи катта тижорий ютуқларга эришишини яхши тушунади», — деб ҳисоблайди NCSC.
Баёнотда айтилишича, Хитой ҳукумати тиббий маълумотларни тўплаш орқали Америка биотехнология саноатини ортда қолдиришни режа қилган. Бу эса АҚШни «Хитой инновацияларига қарам» қилиб қўяди. Натижада Америка меҳнат бозорига катта зарар етади.
The Hill нашриётининг ёзишича, бу хавф-хатар ҳақида ФҚБ директори Кристофер Рей ўтган йили огоҳлантирган. Ўшанда у Сенатда «америкаликларнинг коронавирус, вакцина, даволаш усуллари, тестдан ўтказиш технологиялари билан боғлиқ изланишларига дахл қилувчи хитойликларнинг жуда агрессив ҳаракатларини» кузатганини маълум қилган.
Аввалроқ АҚШ давлат котиби Хитой билан муносабатларни АҚШ учун энг муҳим деб атагани ҳақида хабар берилган эди.