Аёллар костюм-шим кийишда йўл қўядиган хатолар

Ёрқин рангдаги костюм-шимларни кийиш кўпроқ замонавий аёлларга хос. Аммо бу борада айримлар бир қанча хатоликларга йўл қўяди. Уларни такрорламаслик учун қуйида батафсил маълумотга эга бўлиш мумкин.

Бугунги кунда икки тугмали костюм-шимлар трендда. Аммо модага интилиш ортидан ташқи кўринишга путур етказмаслик зарур. Ушбу бичимдаги устки костюм қоматни бироз семиз қилиб кўрсатади. Агар чиндан ҳам белдан юқори қисмини бироз тўлароқ кўринишини истовчилар бўлса, бу яхши фикр. Аммо бу борада костюм кенглигидаги шимни танлаш тавсия этилади. Шундагина либослар бир-бирини тўлдиради. Агар шим бироз тор бўлса, костюм ўз-ўзидан кенг кўринишни ҳосил қилади.

Костюмнинг нотўғри енг узунлиги ҳам навбатдаги хатоларнинг бири бўлиши мумкин. Мукаммал ҳолда енг қўл суяги устида тугаши керак. Айнан шу узунлик қоматга мос нисбатни яратади. Агар бўйни визуал тарзда узун қилишни истайдиганлар бўлса, костюм енги янада калтароқ бўлиши керак. Кафт қисмига тушиб турувчи енглар эса ўз-ўзидан бўйни пастроқ ҳамда қўлни гавдага нисбатан узун кўрсатади. Натижада ташқи кўринишда номутаносиблик пайдо бўлади.

Оёқ кийимни ёпадиган узунликдаги кенг шим бўйи паст қизларга мос келмайди. Аммо бу умуман костюм-шим киймаслик керак дегани эмас. Бундай ҳолда либоснинг узунлиги ҳақида яхшилаб ўйлаш ва бўйга муносибини танлаш тавсия этилади. Агар шим узунлиги пойабзални охиригача ёпмаса, бўйни баландроқ кўрсатади. Аммо бунинг акси бўлса, атрофдагиларда худди бошқа бировнинг кийимини кийиб олгандек таассурот пайдо бўлиши мумкин.