Тошкентда уй-жой учун қалбаки кадастр ҳужжати тайёрлаган шахслар ушланди, деб хабар бермоқда ИИВ матбуот хизмати.
Маълум бўлишича, 23 январь куни фуқаро Г.Н. ИИВга ариза билан мурожаат қилган. Унда айтилишича, пул зарурлиги туфайли у Тохир ва Гулмира исмли шахслардан 10 минг доллар қарздор бўлиб қолган. Бироз вақт ўтгач улар берган қарзларини фоизи билан 17 300 доллар қилиб қайтариб беришини талаб қилган.
Г.Н. бунча пул тополмагач Тохир ва Гулмира унга яшаш хонадонини сотиб, пулларни беришини талаб қилган. У эса ушбу хонадон уларга кўп болали оила бўлишгани учун Президент совғаси сифатида берилганини, уйнинг кадастр ҳужжатлари ҳали расмийлаштирилмаганини айтган.
Бундан фойдаланган Тохир ва Гулмира фирибгарлик йўли билан мўмай даромадни қўлга киритиш мақсадида тил бириктириб, унга уй учун кадастр ҳужжатини тайёрлаб беришларини айтишган. Сўнгра уйнинг кадастр ҳужжатини 10 минг доллар эвазига Миробод тумани ҳокимиятидаги танишлари орқали расмийлаштиришганини айтиб, ушбу пулларни ҳам қўшиб, жами 27 300 доллар беришни талаб қилган.
Мазкур аризага асосан, шу куни ИИВ ЖҚББ Коррупция ва иқтисодий жиноятларга қарши курашиш бошқармаси ходимлари томонидан ўтказилган тезкор тадбир давомида фуқаролар У.Т. ва А.Г. Яккасарой туманидаги кафелардан бирида ариза муаллифи Г.Н.дан 27 300 долларни олиб, унга сохта кадастр ҳужжатини бераётган вақтда ашёвий далиллар билан ушланган.
Кўрилган чоралар натижасида У.Т. ушбу қалбаки ҳужжатни ўзига тегишли ноутбукда ясагани аниқланиб, ноутбук ашёвий далил сифатида олинган.
Ҳолат юзасидан Бош прокуратура ҳузуридаги Иқтисодий жиноятларга қарши курашиш департаменти Яккасарой тумани бўлими томонидан Жиноят кодексининг 168-моддаси 2-қисми «б» банди (бир гуруҳ шахслар томонидан олдиндан тил бириктириб фирибгарлик содир этиш), 28,211-моддаси 1-қисми (пора бериш) ва 228-моддаси 1-қисми (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари олиб борилмоқда.
Изоҳ (0)