Либос ёки аксессуарлар танлаганда замон билан ҳамнафас бўлган яхши, лекин бир нарсани ёддан чиқармаслик керак: қомат ва тана тузилиши ҳар кимда индивидуал. Бошқа бир кишига ярашган ва тренддаги либос, сизга умуман тўғри келмаслиги мумкин.
Кенг ёқали либос
Фото: Cosmopolitan
Образни қизиқарли қилиши мумкин бўлгани билан бундай либосни елкаси ва кўкрак қафаси кенг қизларга кийиш тавсия қилинмайди. Чунки кенг ёқалар ҳисобига тананинг белдан тепа қисми янада йирик кўринади. Бунинг ўрнига бўйин қисми учбурчак либос моделларига эътибор қаратиш тавсия қилинади.
Кичкина сумкалар
Фото: Cosmopolitan
Аксессуар ва деталларни қомат пропорциясидан келиб чиққан ҳолда танлаш керак. Шу сабаб ҳам кичик ҳажмли сумкаларни харид қилиш тавсия қилинмайди. Бундай сумкалар сўнгги вақтларда ҳар қачонгидан ҳам долзарб эканлигига қарамай, тўладан келган аёлларга унчалик тўғри келмайди. Чунки сумка кичиклиги ҳисобига уни тутган аёл ёки қиз аслидан ҳам йирик бўлиб кўринади.
Белдан пастда турадиган шим ёки юбка
Фото: Cosmopolitan
Белла Хадид, Эмили Ратаковски сингари машҳурлар гардеробида учратиш мумкин бўлган мазкур бичим асосан нозик ва хипчабел қизларга ярашишини унутманг. Бошқаларнинг эса қоматини хунук ва бўйини ҳам паст кўрсатади.
Елка қисми кенг либослар
Фото: Cosmopolitan
Либоснинг елка қисми кенглиги ҳисобига уни кийган аёл ёки қиз сарвқомат кўриниши мумкин. Лекин ҳаммада ҳам эмас. Қомати тўртбурчак ва учбурчак шаклни эсга соладиган нозик жинс вакилларини кўнгилдагидек кўрсатмайди. Елкалар кенг, гавданинг тепа қисми нопропорсионал кўринади.
Енги кенг кийимлар
Фото: Cosmopolitan
Енги кенг либослар ҳам елкаси кенг кийимлар сингари хусусиятга эга. Агар белдан юқори қисмингиз шундоқ ҳам кенг бўлса, бу каби либос ва элементлардан воз кечинг.
Чарм матодан тикилган шим
Фото: Cosmopolitan
Мода ихлосмандларининг энг севимли кийимларидан бир ҳисобланган чарм шим ҳаммага ҳам ярашавермайди. Чарм мато қоматни тўлароқ кўрсатгани сабаб уни кийган аёл-қизнинг оёқлари ва бели аслидан семиз кўринишга эга бўлади. Бундан қочиш учун ялтирамайдиган матодан тикилган шимларга эътибор қаратиш тавсия қилинади.
