Президент Шавкат Мирзиёев раислигида 27 январь куни ўтказилган видеоселектор йиғилишида давлат раҳбари Ўзбекистондаги олий ўқув юртларининг талабалар турар жойларига эътибор қаратиш зарурлигини қайд этди, дея хабар бермоқда «Дарё» мухбири.
«Сўнгги тўрт йил мобайнида олийгоҳлар сони 47 тага ортиб, бугунги кунда 129 та олий ўқув юртида 500 мингдан ортиқ талаба таълим олмоқда. Лекин биргина пойтахтдаги 85 та талабалар уйи атиги 13 фоиз ёшларни турар жой билан таъминлаш имкониятига эга. Ёки 18 минг нафар талаба таҳсил олаётган Самарқанд давлат университетида бор-йўғи 1 минг 600 ўринли ётоқхона мавжуд», – деди Шавкат Мирзиёев.
Давлат раҳбари бош вазир ўринбосари Беҳзод Мусаев, молия ҳамда олий ва ўрта махсус таълим вазирлари вилоят ҳокимлари билан бирга бир ой муддатда 2021–2023 йилларда «Талабалар уйлари» ташкил этиш дастурини ҳукуматга киритиш бўйича топшириқ берди.
Аввалроқ Президент Тошкент шаҳрида 77 мингта вакант иш ўринлари мавжуд, шундан 45 мингтасига олий маълумот талаб этилмаслиги, туман сектор раҳбарлари ҳафтанинг икки кунини фақат ёшлар муаммоларини ҳал этишга ажратишини ҳамда Ўзбекистондаги 18-30 ёшлилар орасидаги расмий ишсизлар сонини маълум қилганди.
Изоҳ (0)