2020 йилда Бандликка кўмаклашиш марказларига 1 миллион 96 минг нафар фуқаро мурожаат қилган. Бу ҳақда бандлик ва меҳнат муносабатлари вазири Нозим Ҳусанов АОКАда бўлиб ўтган матбуот анжуманида маълум қилди.

Фото: «Дарё» / Мадина Нурман

«Ўтган 2020 йилда пандемия муносабати билан Бандлик ва меҳнат муносабатлари вазирлигига одатдагидан кўра 2-3 баробар кўпроқ масъулият юкланди. Турли корхоналар фаолиятини тугатишга мажбур бўлди ва бунинг ортидан фуқаролар ишсиз қолди. Бунинг натижасида туман ва шаҳарлардаги ҳудудий бандликка кўмаклашиш марказларига 1 миллиондан ортиқ киши иш сўраб мурожаат қилди», – деди Нозим Ҳусанов.

Таъкидланишича, Бандликка кўмаклашиш марказларига жами 1 миллион 96 минг нафар фуқаро мурожаат қилган. Уларнинг 362 минг нафарига ишга жойлашиш бўйича кўмак берилган, 521 минг нафари вақтинчалик ҳақ тўланадиган жамоат ишларига жалб қилинган, 36 минг нафар фуқароларга деҳқончилик қилиши учун субсидиялар ажратилган бўлса, 12 минг нафар фуқарога тадбиркорлик фаолиятини бошлаш учун субсидия берилган.

Эслатиб ўтамиз, коронавирус пандемияси даврида Ўзбекистонда ишсизлар сони 2 миллионга яқинлашгани маълум қилинган ва 27 минг нафар ишсизга 20 миллиард сўмга яқин нафақа тўлаб берилган эди.