Buxoro boshqa viloyatlardagi rivojlanishdan 10 yil orqada qolyapti, korrupsiya, poraxo‘rlik barham topmayapti. Bu haqda Shavkat Mirziyoyev Xalq deputatlari Buxoro viloyati kengashining 22-yanvar, juma kuni o‘tkazilgan navbatdan tashqari sessiyasida aytib o‘tdi. Prezident matbuot xizmatining xabar berishicha, sessiyada davlat rahbari hududni ijtimoiy-iqtisodiy rivojlantirish vazifalariga to‘xtaldi.

Foto: “Daryo” / Madina Nurman

“Buxoroning bugungi rivoji ma’qulmi, degan savolga mening javobim: yo‘q. Boshqa viloyatlardagi rivojlanishdan 10 yil orqada qolyapti. Korrupsiya, poraxo‘rlik barham topmayapti. Yalpi hududiy mahsulotda qishloq xo‘jaligi ulushi 50 foiz ekani eski zamondan nishon. Sanoat, xizmat ko‘rsatish, tadbirkorlik bo‘yicha viloyatning imkoniyatlari juda keng. Tuman hokimlari, sektor rahbarlarining dunyoqarashi o‘zgarishi kerak”, — degan Prezident.

Qayd etilishicha, mavjud 544 ta mahallaning har biri o‘rganilib, 333 tasi “qoniqarli”, 182 tasi “o‘rta” va 29 tasi “past” rivojlanish toifalariga ajratildi. Aholiga daromad manbayi yaratish zaxiralari aniqlangan.

Shuningdek, joylardagi muammo va imkoniyatlarni mahalla darajasida o‘rganish, aholi bandligi va daromadini ta’minlash, tadbirkorlikni rivojlantirish bo‘yicha yangi ish tizimi joriy etilishi kerakligini ta’kidlagan.

“Endi jamiyatimizda boshqacha yo‘nalish bo‘ladi — mahalla katta kuchga aylanadi. Agar mahalla raisi bilimli, fidoyi bo‘lsa, kayfiyat ham, iqtisodiyot ham o‘zgaradi”, — degan davlat rahbari. Shu maqsadda viloyatga ishchi guruh yuborilgan, shahar va tumanlarga vazirlik, idora va tijorat banklari rahbarlari biriktirildi.

Xabarda aytilishicha, davlat rahbari ishsizlik muammosiga alohida to‘xtaldi. Yangi ish o‘rinlari ochish va o‘z-o‘zini band qiluvchilarga sharoit yaratish bo‘yicha ko‘rsatmalar berildi. Oilaviy tadbirkorlik, yoshlar biznes loyihalariga 390 milliard so‘m imtiyozli kreditlar ajratilishi belgilandi. Har bir tumanda bittadan kasb-hunar maktabi tanlab olinib, uning bazasida monomarkazlar tashkil etiladi, mahallabay o‘rganish natijasi o‘laroq ishsizlar, yoshlar va ayollar talab yuqori kasblarga o‘rgatiladi.

Foto: “Daryo” / Madina Nurman

Buxoro viloyatida 2021—2022-yillar uchun umumiy qiymati qariyb 19 trillion so‘m bo‘lgan 713 ta investitsiya loyihasi shakllantirilgan. Shundan 555 tasi bu yil amalga oshirilishi, 14 mingdan ziyod yangi ish o‘rni yaratilishi rejalashtirilgan.

Xizmat ko‘rsatish sohasi salohiyatini to‘liq ishga solish, jumaladan, ziyorat turizmini yana-da rivojlantirish zarurligi ta’kidlandi. Jumladan, qadimiy “G‘ijduvon qo‘rg‘oni”ni qayta tiklab, ochiq osmon ostidagi muzey barpo etish, Vobkent tumanida “Shirin” qishlog‘ini etnoturizm maskaniga aylantirish, Peshku tumanining Afshona qishlog‘ida “Ibn Sino zamonasi” majmuasini tashkil etish bo‘yicha topshiriqlar berildi. Buxoro zardo‘zligi va zargarligi xalqaro festivalini o‘tkazish tashabbusi ilgari surildi.

Ijtimoiy sohalarni rivojlantirish, yangi ta’lim va tibbiyot muassasalari tashkil etish masalalariga ham e’tibor qaratildi. 2021-yilda Buxoroda Prezident maktabi faoliyat boshlaydi. Matematika, axborot texnologiyalari, kimyo-biologiya va fizikaga ixtisoslashgan 16 ta maktab tashkil etiladi. Shuningdek, 18 ta maktabni rekonstruksiya qilish belgilangan.

Bundan avval Xalq deputatlari Buxoro viloyati kengashining 22-yanvar kuni bo‘lib o‘tgan navbatdan tashqari 25-sessiyasida nomzodi Prezident tomonidan tavsiya qilingan Botir Zaripov Buxoro viloyati hokimi lavozimiga tasdiqlangani haqida xabar berilgan edi.

Eslatib o‘tamiz, Shavkat Mirziyoyev hududlar rivoji, aholi hayoti bilan yaqindan tanishish maqsadida 21-yanvardan buyon Buxoro viloyatida bo‘lib turibdi. Tashrif davomida Prezident to‘rtta tuman faollari bilan uchrashdi, “Buxoro Varnet” agrosanoat majmuasini borib ko‘rdi,  Bukhara Cotton Textile korxonasi faoliyati bilan tanishdi.