2020-yilda Bandlikka ko‘maklashish markazlariga 1 million 96 ming nafar fuqaro murojaat qilgan. Bu haqda bandlik va mehnat munosabatlari vaziri Nozim Husanov AOKAda bo‘lib o‘tgan matbuot anjumanida ma’lum qildi.
“O‘tgan 2020-yilda pandemiya munosabati bilan Bandlik va mehnat munosabatlari vazirligiga odatdagidan ko‘ra 2-3 barobar ko‘proq mas’uliyat yuklandi. Turli korxonalar faoliyatini tugatishga majbur bo‘ldi va buning ortidan fuqarolar ishsiz qoldi. Buning natijasida tuman va shaharlardagi hududiy bandlikka ko‘maklashish markazlariga 1 milliondan ortiq kishi ish so‘rab murojaat qildi”, – dedi Nozim Husanov.
Ta’kidlanishicha, Bandlikka ko‘maklashish markazlariga jami 1 million 96 ming nafar fuqaro murojaat qilgan. Ularning 362 ming nafariga ishga joylashish bo‘yicha ko‘mak berilgan, 521 ming nafari vaqtinchalik haq to‘lanadigan jamoat ishlariga jalb qilingan, 36 ming nafar fuqarolarga dehqonchilik qilishi uchun subsidiyalar ajratilgan bo‘lsa, 12 ming nafar fuqaroga tadbirkorlik faoliyatini boshlash uchun subsidiya berilgan.
Eslatib o‘tamiz, koronavirus pandemiyasi davrida O‘zbekistonda ishsizlar soni 2 millionga yaqinlashgani ma’lum qilingan va 27 ming nafar ishsizga 20 milliard so‘mga yaqin nafaqa to‘lab berilgan edi.
Izoh (0)