Аксарият ҳолларда иммунитетнинг сусайиши сабаб кузатиладиган, оқибати деменсия, пневмония ҳатто фалаж бўлиш билан тугаши мумкин бўлган герпес вируси ҳақида маълумот бериб ўтамиз.
Герпес нима?
Шифокорларга ушбу вируснинг 8 тури яхши маълум, улардан учтаси кўп тарқалган. Биринчи турида вирус оғиз, бурун, кўз шиллиқ қавати ҳамда тери қопламини зарарлайди ва маиший алоқа йўли билан юқади. Иккинчи жинсий алоқа йўли билан юқадиган турида шамоллаш лабда намоён бўлади. Учинчиси эса ўраб олувчи темираткиларни келтириб чиқаради.
Нима учун хавфли?
Герпесни буткул даволаб бўлмайди, симптомлар ўтиб кетгани билан вирус нейронлар ДНКсида сақланиб қолади. Ўтказилган тадқиқотларда вируснинг тери ҳужайраларидан марказий асаб тизимига ўтиб, ДНКга ўрнашиб олиши аниқланган. Иммунитет паст бўладиган бўлса вируслар янада фаол бўлиши ва МНС ва бошқа ички аъзоларга жиддий зарар етказиши мумкин. Бош мия ҳам зарарланадиган бўлса, оқибати фалажлик ёки ўлим билан ҳам тугаши мумкин. Герпес билан туғилган (онадан болага ўтадиган бўлса) боланинг вафот этиши эҳтимоли юқори бўлади ёки ривожланишида жиддий муаммолар кузатилади. Қолаверса, генитал герпес (жинсий йўл билан юқадиган герпес) аёлларда бачадон бўйни, эркакларда эса простата бези саратони ривожланишига сабаб бўлиши мумкин.
Қандай симптомлари бор?
Оғиз, кўз ва бурун шиллиқ қаватида кичик пуфаксимон тошма тошишидан ташқари бошқа симптомлар ҳам мавжуд. Ушбу аломатлар борлиги сезилганда зудлик билан шифокорга мурожаат қилиш керак.
Танада санчиқни ҳис қилиш
Аёлларнинг қорнидан пастки соҳаси ва белида санчиқлар кузатилиши мумкин.
Қичима
Қичима ҳам герпесга хос симптомлардан бири ҳисобланади. Ушбу белгилар кучли ёки номига кузатилганда ҳам шифокорга боришни кечга қолдириш керак эмас.
ЎРВИ пайдо бўлаётганига хос симптомлар
Бош оғриши, суяк ва мушакларнинг зирқираб оғриши, ҳароратнинг кўтарилиши ва лимфа тугунларининг яллиғланиши каби симптомлар кузатилади. Агар ЎРВИ симптомлари юқорида таъкидланган бошқа аломатлар билан бирга кузатиладиган бўлса, бефарқ бўлмасдан текширтириш керак.
Қориндан пастки соҳада оғриқ
Қориндан пастки соҳада оғриқ бачадан бўйни яллиғланганидан дарак бериши мумкин. Бунга эса герпес вируси сабаб бўлган бўлиши мумкин.
Сийдик йўлларидаги оғриқ
Герпес яра ва тошмалари сийдик йўлида бўлиши ва бу оғриқни ҳис қилишга сабаб бўлиши мумкин. Бу эса шифокорга боришни ортга сурмасликка жиддий сабаб бўла олади.
Изоҳ (0)