Фойдасидан зарари кўпроқ бўлган ҳаммага таниш 3 нонушта

Кунни нафақат мазали, балки фойдали маҳсулотлардан тайёрланган нонушта билан бошлаш зарур. Кун давомида энергияга тўла бўлиш, ўзини яхши ҳис қилиш ва саломатликда муаммо келиб чиқмаслиги учун эса нима фойдали ва зарарли экани ҳақида маълумотга эга бўлиш керак.

Тухум

Оқсиллар, ёғ кислоталари, витамин ва минералларга бой ҳисобланадиган тухумни мутахассислар қовурилган ҳолда истеъмол қилишни тавсия қилмайди. Ҳатто зайтун ёғида қовурган тақдирда ҳам ушбу нонушта калорияли ҳисобланади ва юракни зўриқтириши мумкин. Тонгни мазали ва фойдали нонушта билан бошлаш учун тухумни қаттиқ қилиб қайнатиш, пашот усулида ёки тагига олмайдиган қопламали товада пишириш керак.

Смузи

Instagram блогерларнинг саҳифасига жойлайдиган иштаҳа очар қилиб безатилган, ранг-баранг смузиларни кўрган кўпчилик уни фойдали нонушта деб ҳисоблайди. Картошка фри, торт бўлаги сингари зарарли бўлмагани билан смузини буткул фойдали нонушта деб бўлмайди. Мевалар фойдали эканига қарамай, тез ҳазм бўладиган углеводларнинг кони экани сабаб ҳам смузи истеъмолидан кейин қондаги қанд миқдори кескин кўтарилади ва бир зум ўтмай инсон икки карра очликни ҳис қилади. Калорияга бой экани (100 граммида 300-400 ккал бўлади) сабаб ҳам ушбу нонушта саломатлик ва организмга ижобий таъсир қилмайди. Қолаверса, ортиқча шакар вазн ортиши ва терида муаммо келиб чиқишига олиб келади.

Ёғсиз йогурт ёки творог

Творог, йогурт ёки кефир харид қилганда асосан таркибидаги ёғ миқдори қанча эканига эътибор қаратилади. Аслида эса ёғсиз бу каби маҳсулотлар ёғли вариантидан кўра кўпроқ зарар етказади. Табиий сутдан таркибида ёғ бўлмаган маҳсулот тайёрлаб бўлмайди ва шунинг учун ҳам сунъий усулда ёғсизлантирилади. Ушбу жараёндан кейин маҳсулотнинг нафақат ёғи, таъми ва кўриниши ҳам ўзгаради. Таъми ва кўринишини тўғрилаш учун эса консервантлар, табиий бўёқлар (краситель) ва шакар қўшилади. Шунинг учун ҳам бундай маҳсулотлар истеъмоли калорияни кўпайтиради ва очликни тез ҳис қилишга сабаб бўлади. Ёғли творог (5 фоизли) қоматга ёғсизидан кўра камроқ зарар етказади ва қоринни узоқ вақт давомида тўқ тутади.