Xiaomi смартфонлар учун кўринмас камера яратди

Xiaomi компанияси инновацион ечим ҳисобига икки йўналиш бўйлаб суратга олиш ишларини амалга оширувчи ноодатий яширин камерани патентлади, деб хабар беради IXBT.

Бу борадаги патент 2021 йил бошида маъқуллаган, LetsGoDigital ресурси эса ушбу патент тасвирлари базасида қурилманинг сифатли рендерини яратган. Камера модуллари смартфон панелининг юқори қисмида жойлашган ва тепага йўналган.

Датчик томонидан қамраб олинадиган тасвирни акслантириш учун силжийдиган кўзгу элементидан фойдаланилади, у нафақат силжийди, балки бурилади ҳам. Яъни битта яширин камера тизими орқали оддий ва селфи суратга олишларни амалга ошириш мумкин. Натижада, камера фойдаланилмаганида у олд томонидан ҳам, орқа тарафидан ҳам кўринмайди.

Технологиядан суратга ва видеога олиш ишларида, шунингдек, телефонни юз ёрдамида блокдан чиқаришда фойдаланиш мумкин.

Айни вақтда Xiaomi бу каби камерадан фойдаланиши ёки фойдаланмаслиги номаълум. Ҳозирча кўпчилик Xiaomi’дан камераси экран остига жойлашган смартфонни кутмоқда.

Эслатиб ўтамиз, сентябрь бошида Хитойнинг ZТЕ компанияси «яширинган» фронтал камерага эга биринчи смартфон — Axon 20 5G’ни тақдим этганди. Бироқ кейинроқ экрани остида «кўринмас» камерага эга смартфон ўзини оқламагани тўғрисида хабар берилган эди.