Андижонда 16 нафар йигит-қиз ҳоким вазифасини бажаришга киришди

Андижон вилоятида 16 нафар ёш йигит-қиз 10 кун муддатга шаҳар ва туман ҳокимлари, ҳоким ўринбосарлари лавозимини эгаллади. Шунингдек, 48 нафар ёш эса уюшмаган ёшлар билан ишлаш бўйича сектор раҳбарларига узоқ муддатга бириктирилди. Бу ҳақда вилоят ҳокими Шуҳрат Абдураҳмоновнинг ёшлар етакчилари билан учрашувида маълум қилинди, дея хабар берди «Дарё» мухбири.

Таъкидланишича, 20 январь, чоршанба куни Шуҳрат Абдураҳмонов раислигида видеоселектор тарзида умумтаълим мактаблари ҳамда олий таълим муассасаларида фаолият олиб бораётган ёшлар етакчилари билан учрашув ўтказилган. Унда ёшлар етакчилари фаолиятининг самарадорлигини ошириш, ўқувчи-ёшлар ҳамда уюшмаган ёшлар билан ишлаш тизимини самарали йўлга қўйиш масалаларига алоҳида эътибор қаратилган. Йиғилишда «ёшлар дафтари»га киритилган уюшмаган ёшлар билан «Тенгдош тенгдошга» тамойили асосида ишлаш масаласи муҳокама қилинган.

Шундан сўнг вилоят раҳбари 2021 йил 20 январдан 30 январга қадар «Андижонда ёшлар ўн кунлиги» лойиҳаси доирасида 16 нафар ёш 10 кун муддатга шаҳар ва туман ҳокимлари ўрнини эгаллаганини маълум қилган. Шунингдек, 48 нафар ёш сектор раҳбарларига бириктирилган.

Ёшлар ишлари агентлиги вилоят бошқармаси бошлиғи Ойбек Йўлдошевнинг маълум қилишича, лавозимларга тайинланган ёшларнинг асосий эътибори «ёшлар дафтари»га киритилган уюшмаган ёшлар билан ишлашга қаратилади.

«Ушбу лойиҳа ўтган йилда ҳам ташкил этилиб, яхши самара берган эди. Жорий йилда лойиҳага йил номига қараб ўзгартириш киритилди. Яъни, ёш ҳокимлар асосий эътиборни ‘Тенгдош тенгдошга’ тамойили асосда уюшмаган ёшлар билан ишлашга қаратади. Улар маҳаллаларда уюшмаган ёшлар билан учрашувлар ўтказиб, уларнинг муаммо ва таклифларини ўрганишади ҳамда жойида ҳал этишга ҳаракат қилишади. Ёш ҳокимлар якунда раҳбарлик лавозимларидаги фаолияти юзасидан ҳисобот тайёрлайди ва таклиф беради. Қолган 48 нафар ёш эса бир ойдан бир йилга қадар бўлган муддат давомида сектор раҳбарлари билан биргаликда ёшлар масалалари билан шуғулланишади»,— дейди Ойбек Йўлдошев.

Эслатиб ўтамиз, 2020 йил 17 январь куни Қашқадарё ҳокими Зоир Мирзаев ўринбосарлари ва 15 нафар ҳудуд ҳокими тиббий кўрикдан ўтиш ҳамда даволаниш мақсадида Тошкент шаҳрига жўнаб кетганди. Уларнинг ўрнини эса ёшлар эгаллаб, 10 кун муддатга ҳудудни бошқаришга киришганди.