Самарқанд вилоятидаги ҳали қуриб битказилмаган хонадонларнинг бирида 2021 йилнинг 18 январь куни кечки пайт кучли ёнғин келиб чиқди. Маълум бўлишича, у ерда газ тўлдирилган 20 та маиший газ баллони портлаган.
Вилоят Фавқулодда вазиятлар бошқармаси ахборот хизматининг «Дарё»га маълум қилишича, шу куни кеч соат 20:08 да вилоят Фавқулодда вазиятлар бошқармаси навбатчи диспетчерлик хизматига ўзини Р.Ш. деб таништирган фуқаро қўнғироқ қилиб, Самарқанд тумани «Ражабамин» маҳалласида яшовчи 1975 йилда туғилган фуқаро О.Н.нинг ҳали қуриб битказилмаган уйида ёнғин содир бўлаётганини айтган.
Олинган хабарга асосан бу ишга 4 та ёнғин-қутқарув техникаси сафарбар қилинган бўлиб, экипажлар воқеа жойига соат 20:23 да етиб борган. Соат 21:22 да ёнғин ўраб олиниб, 22:16 да ўчирилган. Ёнғиндан хонадоннинг, тахминан, 50 квадрат метр майдони, 2021 йилда ишлаб чиқарилган оқ рангли Damas автомашинаси зарарланган. Шунингдек, ёнғинни ўчириш жараёнида қутқарувчилар томонидан мазкур хонадоннинг ертўласидаги мавжуд бўлган ёнғиндан зарар кўрган, тахминан 20 дона маиший газ баллони олиб чиқилиб, хавфсизлиги таъминланган. Ёнғин оқибатида ҳеч ким жабрланмаган.
Ёнғиннинг келиб чиқиш сабабларини аниқлаш мақсадида туман ИИБ томонидан терговолди суриштирув ҳаракатлари олиб борилмоқда.
