Siyosatchi Aleksey Navalniy Rossiyaga qaytishini ma’lum qildi. Meduza’ning xabar berishicha, u Moskvaga “Pobeda” reysi bilan 17-yanvar kuni uchib keladi.

“Qaytish yoki qaytmaslik degan savol mening oldimda hech qachon turmagan. Chunki men ketmaganman. Germaniyaga reanimatsiya qutisida kelib qoldim, bitta sabab bilan: meni o‘ldirmoqchi bo‘lishdi”, — degan Navalniy.

Siyosatchining ta’kidlashicha, unga qarshi yangi jinoyat ishi ochayotgan “Putinning xizmatkorlari” harakati “unchalik qiziq emas”.

Aleksey Navalniy 2020-yil avgustidan beri Germaniyada. U Tomsk—Moskva samolyotida o‘zini yomon his qilgani sababli davolanish uchun olib ketilgan. Tahlillar natijasiga ko‘ra, Navalniy “Novichok” guruhidagi modda bilan zaharlangani ma’lum bo‘ldi. Dekabr oyida Bellingcat va The Insider siyosatchini Federal xavfsizlik xizmatining sakkiz nafar xodimidan iborat maxsus guruh zaharlagani ta’kidlangan tekshiruv natijalarini e’lon qildi.

29-dekabr kuni Tergov qo‘mitasi katta miqdordagi firibgarlik uchun Navalniyga qarshi jinoiy ish qo‘zg‘atdi. Tergov versiyasiga ko‘ra, Navalniy, KKF (Korrupsiyaga qarshi kurash fondi) va boshqa notijorat fondlarning “haqiqiy rahbari sifatida”, “boshqa shaxslar bilan hamkorlikda” xayriya sifatida yig‘ilgan va faqat fond maqsadlari uchun mo‘ljallangan 588 million rublning 356 millionini shaxsiy maqsadlari yo‘lida sarflagan.

12-yanvar kuni Jazolarni ijro etish federal xizmati “Iv Roshe” ishi bo‘yicha Navalniyga shartli muddatni haqiqiysiga almashtirishni so‘rab sudga murojaat qildi. Idora o‘z harkatini Germaniyada bo‘lib turgan Navalniy shartli hukm majburiyatlarini bajarmayotgani va jinoiy-ijro inspeksiyasi nazoratidan bo‘yin tovlayotgani bilan izohlagan.